Paul Auster idazleari omenaldia egin zioten Villa Albertine liburu-denda txairoan. Siri Husvedt haren alargunak hitz egin zuen aurrena, bikain. Ondotik, itzultzaileek, editoreek, irakurleek hartu zuten hitza. Azkena, Philipe Petit funanbulista izan zen.
Titiriteroak kontatu zuen gaztetan ezagutu zutela elkar Auster eta biak Parisen. Petitek Notre Dame katedrala punta batetik bestera kable baten gainean igaro nahi zuen, legez kanpo, eta idazleak trasteak eramaten lagundu zion. Geroztik, betirako lagun.
Auster gaixotu zenean Petitek bisitan joan ahal zitzaion galdetu zion. “Arratsalde osoa magia trukoak egiten pasatzen baduzu, bai”, izan zen idazlearen erantzuna, “ez dut kontu tristerik nahi”.
Petit famatua egin zen mundu osoan 1974ko abuztuan New yorkeko dorre bikien puntan egin zuen akrobaziagatik. Dorre batetik bestera kablea jarri eta hiru ordu laurden ibili zen oinez eta dantzan kable gainean, eta etzan ere egin zen, kaioei kaixo esanez.
Baimenik eskatu ez zuenez (zertarako), polizia joan zitzaion atzetik. Baina jakina, ezin ziren kable erdira bila joan. Petitek iseka egiten zien, burlaka, nahi bazuten hurreratzeko esanez. Euria hasi zen eta azkenik titiriteroak nahikoa zela erabaki zuen.
Eraikinaren etzera iritsi zenean poliziek zakar hartu zuten eta eskaileretan behera bota zuten artista. “Egun hartako unerik arriskutsuena eskaileretako hura izan zen”, oroitu zuen Petitek ironiaz.
Agintariei erresistentzia egotzi zioten eta epaiketa izan zuen. Bitxia izan zen epaileak ezarri zion zigorra: New York hiriko umeen aurrean musutruk funanbulismo akrobazia bat egitea. Petitek pozik bete zuen epaia.
Paul Auster adiskidea gogoan hartuta liburu-denako hitzaldia ere magia truko batekin amaitu zuen. Zapi baten barrutik ezustean kopa bat atera eta topa eginez: “Zuregatik, Paul”.
