Bideoak

Doinua: Gaur udaberri bat dabil 

Geldiezinak direnez
burugogorren taupadak
eskuz esku pasa ditu
aldapak eta lautadak.
Bidean gainditu asmoz
oldarraldi eta trabak
beharrezkoak ditugu
emozio betekadak.
Herri libre bat izan nahi
dugu euskalduna erabat
euskaraz bizitzea ez
dadin izan epika bat. (bis)

Doinua: Xilabara jina nauzu

Bidartetik abiatu,

ondoren, igaro kosta:

Hendaia, Zarautz, Ondarroa...

euskara garenoi hoska.

Hizkuntzak lekukoak lez

egin dezakeenez ospa,

heldu egin behar zaio;

nola? Hortxe dago koska.

Korrika ez dabilena,

dabilena ozta-ozta

edo hizkuntza zikintzen

duen queer-ak ezpainei hozka

eginda hitzek bizitzak

ditzaketenez ahoska,

adi, lekukotasunak

eraikitzera gatoz ta.

Euskararen aldeko

« ika, ika, ika! »

Nafarrotik Lapurdi

aldera bisita

Arnasestuka baina

kantuz, irrintzika

Herri bat eta beste

ukondoak tinka

Altxatzen dugulako

unea etorrita

Muga denen gainetik

herri bat Korrika

Doinua: Nere bigarren etxea

Vianatik Oionera

lehenengo bidezidorrak

Kanpezun zabaltzen hasi

bi betazal itsaskorrak

Sakana zeharkatzean

errepideetan obrak

Madotzen gora ederki

berotzen dira motorrak

Larraundik Lizartzaraino

bihotz taupada bizkorrak

KORRIKAk ematen ditu

ustekabeko altxorrak

emanez pauso sendoak,

irmoak ta egonkorrak

bihurtzen dira oinpeko

lurrak ere emankorrak