Koiote bikote bat bizi da Central Parkean. Bertako animalia basatien artean handienak dira koioteak. Bikoteetan bizi dira eta ez dira banatzen bietako bat hiltzen den arte. Hori gertatu zen Central Parkeko koioteekin. Koiote emea bakarrik geratu zen bikotekide berria hartu duen arte.
Baina, nola iritsiko zen koiote berria parkera, galdetzen diogu gure buruari. Izan ere, Central Parkea hiriaren erdian dagoen irla berde bat da, handia baina irla azkenean. Kaleak eta etorbideak ditu inguruan. Ez dago naturarako korridorerik.
Nonbait koiotea kaleak zeharkatuz iritsi zen parkera, gizakiek ez ikusteko moduan, lorategietatik, patioetatik jauzi eginez, automobil eta zabor kontenedoreen itzalean ezkutatuz.
Jaioak dira ezkutaketan koioteak. Gizakien ohitura eta ordutegiak ikasten dituzte eta gu lo gaudenean ateratzen dira beraiek. Zoologoek diote hamaika koiote hiltzen dela auto-istripuetan martxoan edo urrian ordua aldatzen dugun aldiro. Buruz jakiten dute gure ordutegia eta egun batetik bestera aldatzen dugunean beraiek ez dira konturatzen.
Duela egun batzuk, goizeko ordu bietan gaztetxo batek filmatutako bideo batean ageri da animalia bikotea. Horietako bat min hartuta dago, ez du oina lurrean jartzen. Gizakiren batek kolpatuko zuen. Hiltzen bada, ikerlariek diote, beste koiote batek hartuko du bere lekua. Igaroko ditu kaleak, lorategiak eta patioak eta iritsiko da. Koioteak ez dira desagertuko, haien populazioa gorantz omen doa.
Gobernu berriaren neurrietako bat izan da babestuta zeuden landa basatiak ustiatzea. Gizakiak hartuko du atzera ere animalien lekua. Eta bitartean haiek gurera datoz, hiriaren erdigunean dagoen parkera.
Gogoraraziz bezala, beraiek betidanik egon direla hemen, protesta eginez bezala, Trump dorretik harra bete bidera.
