Ia inork ez du idazten eskutitzik orain. Mezu elektronikoak bai, bideo laburrak, mugikorretik testuak. Baina kartak, ez. Hala ere, badu eskuz idatzitako gutun batek berebiziko indarra, badirudi eskuz idaztean gure barren barrenean miatu eta ateratzen ditugula ezkutuko altxorrak.
New Yorken ikasleak animatzen dituzte gutunak idaztera. Agintariei, kirolariei, artistei. Zorionak emateko, miresmena adierazteko, gauzak eskatzeko. Eta batzuetan, jasotzaileek erantzun ere egiten dute.
Asteon gertatu da horrelako zerbait. Eskolako egutegian abenduaren 23a lan eguntzat zetorren. Astelehena izanik eta 24aren bezpera. Bada, asteon idatzi digute eskoletatik esaten 23a ere jai eguna izango dela. Uste genuen udalak hala erabaki duela komenientziagatik baina ez. Gutun batengatik izan da.
Isaac izeneko Brooklyneko 12 urteko gazte batek alkateari idatzi zion eskatuz abenduaren 23a jai izan zedin. Argudiatzen zuen jende gutxi joango zela eskolara, eta gutxi horiek umore txarrez gainera, eta ondorioz ez zutela ezer ikasiko. Eskolak ihesik egiten zutenentzat ere faena zen, ezen hutsa izango zuten notetan. Karta idatzi eta bidali ezezik eskaria change.org atarira jaso zuen eta hainbat eta hainbat gazteren babesa jaso.
Alkateak Isaacen irakasleari deitu zion eskola orduan eta mugikorra bozgorailuarekin jartzeko eskatu. Klase osoaren aurrean esan zion onartzen duela eskakizuna eta 23a jai izango dela. Ikasle guztiak pozez zoratzen jarri ziren, oihu batean. Alkateak eskatu zien gutunak idazten jarraitzeko, beraiek uste ez arren irakurri egiten dituztela.
Ez dakit benetan gutun horrengatik izango zen aldaketa. Beharbada hartua zuten erabakia. Baina udalak gaztetxo hari sinestarazi dio kexak balio duela zer edo zertarako.
