EA, Aralar, Alternatiba eta ezker abertzaleko kideek Udalbiltzako auzipetuak babestu dituzte Madrilen

EAko, Aralarko, Alternatibako eta ezker abertzaleko kideak Madrilen egon dira gaur, Espainiako Auzitegi Nazionalean Udalbiltzako auzipetuei babesa agertzeko asmoz. EAren aldetik Juanjo Agirrezabala Eusko Legebiltzarreko parlamentaria eta Santi Merino egon dira; Aralarren aldetik, berriz, Txentxo Jimenez Nafarroako Legebiltzarreko parlamentaria, Mikel Basabe Eusko Legebiltzarrekoa eta Axun Fernandez; Alternatibaren izenean Jonatan Fernandez joan da, eta, azkenik, ezker abertzaleko Patxi Urrutia, Txelui Moreno eta Katalin Madariaga EHAK-ko parlamentari ohia izan dira bertan.

2008an Eusko Legebiltzarrak Udalbiltzako auzipetuen aldeko ekimena onartu zuen EAJren, EHAKren, Aralarren, EAren eta EBren aldeko botoekin. Hainbat punturen artean, epaiketara Legebiltzarreko ordezkaritza bidaltzea adostu zuten talde horiek.