Diputazioen zerga bilketa %7,2 jaitsi da martxora arte

GASTEIZ. Ekonomiaren geldialdia hasi da antzematen zerga bilketan ere. Arabako, Bizkaiko eta Gipuzkoako ogasunek 2.995 milioi euro bildu dituzte zergetan martxora arte, iaz tarte horretan baino 233 milioi gutxiago (-%7,2). Aurten bilketa %1,9 handitzea espero zuten, baina orain onartu dute bilketa asko jaitsiko dela. Gipuzkoako Aldundiak ohartarazi die udalei %20-25 gutxiago jaso ahal dutela udal funtsetik. Unai Rementeria Bizkaiko ahaldun nagusiak, berriz, kalkulatu du gaur lurraldeko ogasunak 1.000 milioi gutxiago bilduko dituela, baldin eta ekonomia Jaurlaritzak iragarri bezainbeste jaitsiz gero (%3,6).

Oraingoz, kontsumoaren gaineko zergetan antzematen da jaitsiera: %12,1 gutxiago jaso du BEZak; %30,4 hidrokarburoena, %31 alkoholarena, eta %59 gutxiago garagardoarena. Hobeto eutsi diote errenta zergak (-%0,1) eta sozietateenak (+%15,3). Azken horretan 2021ean ikusiko da erorketa, eta errentarenean, apiriletik aurrera.