Zazpi osagaik osatutako pintxo bat sortu dute Gorka Aginagak eta Laura Herrerok. Normalean aprobetxatzen ez diren elikagaiei garrantzia ematea izan dute helburu, eta, horretarako, besteak beste, antxoen buruak erabili dituzte pintxoak osatzeko. Dagoeneko bost aldiz aurkeztu dira Euskal Herriko Pintxo Txapelketara, eta, azkeneko honetan, lehenengo saria ez ezik, beste bi sari ere eskuratu dituzte. Itsasantxoa izan da aurtengo urrezko pintxoa.
Hiru sari jaso dituzue. Espero al zenuten?
Sinestezina izan da. Azken urte honetan guztia galdu dugu, eta ostalaritzako negozioentzat ere hondamendia izan da. Beraz, ikaragarria izan da sari hauek jasotzea. Gainera, dagoeneko bost urte dira parte hartzen dugula. Gauzak ongi egiten jarraitzeko gogoa pizten da, lanean jarraitzekoa; betiere, lan egiten uzten badigute. Maitasun handiz egin dugu pintxoa, eta, gainera, jatetxeko lan talde osoak eginiko lana da.
Zer du berezi pintxo horrek?
Egin ditugun pintxo guztietatik arruntena dela esan dezakegu. Egiteko modukoa den pintxo bat da, eta ia inork aprobetxatzen ez dituen elikagaiak erabiltzen ditugu, hala nola antxoen ontzietako olioa.
Zein izan da zuen helburua?
Zerbait desberdina egin nahi genuen, zerbait transmiti zezakeen lan bat. Pintxo hau bi mokadutan jaten da: lehenak, lehen pisura zaramatza; bigarrenak, azkenekora, eta gorago.
Zeintzuk dira osagaiak?
Zazpi osagai ditu pintxoak, eta zaporeen fusio bat da. Oinarrian txipiroien tintarekin eginiko opil mexikar bat dago, eta baita guakamolea ere. Lau orduz marinatutako antxoa bat ere badu, eta burua eta isatsa erabiltzen ditugu. Horrez gain, pomeloarekin, laranjarekin, limoiarekin eta limarekin eginiko gel bat ere badu, eta beste zitriko batzuekin eginiko goxoki bigun bat. Baita ozpin saltsa bat ere.
Pintxoaz gain, aurkezpenean altxorren mapa bat ere aurkeztu duzue.
Orain arteko irabazleak omentzeko era bat da, izugarriak direlako. Gida gastronomiko bat dela esan daiteke, gure jatetxetik hasi eta gainontzeko guztiak igarotzen dituena. Izan ere, lehiaketa honetara etortzen garen bakoitzean oso ongi pasatzen dugu, eta lagun handiak egiten dira. Hori ere bada etortzen jarraitzeko arrazoietako bat.
Garrantzitsua al da gainontzeko parte hartzaileak ezagutzea?
Oso. Guztia elkarren artean banatu ohi dugu beste sukaldariekin. Ideiak sortu egiten dira, eta aurrez dauzkagun guztiak ere banatzen ditugu elkarrekin; esate baterako, errezetak. Lehiaketa bat da, baina ez dugu hala sentitzen, lagun artean gaudelako.
Eta, orain, egongo al da pintxoa dastatzeko aukerarik?
Noski. Jatetxea irekitzeko aukera ematen digutenean, dastatzeko moduan jarriko dugu pintxoa. Izan ere, Nafarroan orain ez dugu ostalaritza irekita edukitzeko aukerarik. Gainera, aurreko urteetan aurkeztu ditugun pintxoak ere dastatu daitezke, ordutegi jakin batean, eta pintxoen karta berezi batekin.
Jarraituko al duzue txapelketa honetan parte hartzen datozen urteetan?
Dudarik gabe. Oztoporik ez badago, eta ahal dugun heinean, gustatuko litzaiguke txapelketa honetan parte hartzea.
