Bordele Akitaniako Orkestra Nazionala
Zuzendaria: Paul Daniel. Biolina: Vadim Gluzman. Egitaraua: I. Txaikovskiren 'Biolinerako Kontzertua', eta W. Waltonen 'Lehengo Sinfonia'. Lekua: Donostiako Kursaala. Eguna: Ekainaren 19a.Denboraldia ez du amaitu Euskadiko Orkestrak; musika zuzendari berriak ekarriko duen etapa antolatzen eta prestatzen ari dira, eta Bordelekoek jasotako gonbidapena izan da urtea amaitzeko aukeratu den musika jaki platera. Bi orkestren arteko konparazioan sartzeko arriskua betiere tentagarria da, eta, nahiz eta oso sakon ez sartu, argi eta garbi esan genezake frantziarrak ez daudela euskaldunen mailan, ez hain urruti, baina Euskadiko Orkestrak kalitate handiagoa du bere atriletan, batez ere haize egur eta harizko instrumentuetan. Bordelekoek Paul Daniel dute podiumean, Galiziako Real Philarmonian dabilen zuzendari geldiezina. Musika ideia askotxo bere pentsamoldean, baina histrioniko puntu larria bere zuzentze ekintzan. Musikariak ez ditu garbi gidatzen: bateratasunean eskuak ez dira finak eta ñabardura txikietan, nahiz eta lotura eta ideia interesgarriak aurreikusi, zuzenean ez dira fidagarri helarazten, nahaste-borraste kaltegarri bat sortzeraino.
Izar gonbidatu gisa Vadim Gluzman biolin jotzailea ekarri dute, hain ezaguna eta teknikoki deabruzkoa den Piotr Ilitx Txaikovskiren Biolinerako Kontzertua gustagarria eskaintzeko. Orkestraren lehengaiak biluzik geratu ziren obra honetan: zurezko haize zalapartatsu bat, hari triste bat eta metalezko haize iskanbilatsu bat. Ehunka orkestratan ohikoa den bezala, Finale pasartea azkarregi planteatzeagatik, ez ziren batera joan, batutaren euskarria ikusezin bihurtuz. Soinu tenk gordin bat du Gluzmanen biolinak, sorginkeria eta gozotasunetik aldentzen den horietakoa. Partiturako zailtasunak gainditzeaz gain, bere interpretazioak ez zuen arima handiegirik nabarmendu, William Waltonen Lehenengo Sinfoniak zer ekarriko zain geratzeraino. Musikagile britainiarraren lanean, orkestra soinu gogorrez aritu zen beti; metalak, ziur baina estu; klarinete eta oboea, bigarren mailan; eta harizko instrumentuak, berriz, elkar entzunez, misteriotik at. Efektu handiko obra da, gustagarria film bateko akziorako, baina biribiltasuna mantentzen txalaparta giroan aritu dira denboraldiko azken nota hauek.
