Bake Idazkaritzari akordioak zailtzea egotzi dio EH Bilduk

Eusko Jaurlaritzako Bake eta Bizikidetza Planaz aditu talde batek egindako txostena hizpide izan zuen atzo Julen Arzuaga EH Bilduko legebiltzarkideak eta, jakinarazi zuenez, joan den maiatzean bildu zen koalizioa adituekin eta planari buruzko «iritzi kritikoa» helarazi zion. Arzuagaren esanetan, Jonan Fernandezek zuzentzen duen Bake eta Bizikidetza Idazkaritzak duen jarrera «itxia» eta «harroa» da, eta, ondorioz, zaildu egiten du akordioak lortzea eta Bake Planaren inguruan adostasunak bilatzea. Hala, Arzuagak «gogoeta sakona» egiteko eskatu zion Bake Idazkaritzari, «adostasunak lortuta normalizazioaren alde lan egiteko». Aditu taldeak nabarmendu zuen planak eraginkortasun txikia duela, eta EH Bildukoak uste du Jaurlaritzak «birmoldatu» egin beharko lukeela, hiru alorretan: «Memoriak poliedrikoa izan behar du, biktima guztiak aintzat hartu behar ditu eta sentsibilitate guztiekin akordioak bilatu behar ditu».