Goi mailan esango du agur

Oraindik ere Iker Irribarriak pilota utzi behar duela sinetsi ezinda ziren pilotazale ugari atzo Labriten. Are gehiago kostako zitzaien sinesten partida ikusita. Eta ez da harritzekoa. Txapelketa bateko azken neurketan erakustaldia emanda irabazi baitzuen, Rezusta atzelari zuela, Peña II.a eta Mariezkurrena II.aren aurka: 22-10. Ordezko lanetan arituagatik ere, goi mailako partida jokatu zuen Irribarriak, eta erasoan nabarmendu zen gehien: hamar tanto egin zituen. Gainera, mesede galanta egin zion enpresari, hirugarren sailkarazi baitzuen Peio Etxeberriak eta Rezustak osatzen duten bikotea. Horiek horrela, erabakita daude kanporaketak.

Datorren ostiralean jokatuko dute elkarren aurka hirugarren eta laugarren sailkatuek, Zornotzan (Bizkaia): Peio Etxeberriak eta Rezustak Lasoren eta Imazen aurka. Bikote horiek abantaila izango dute; izan ere, irabaziz gero, finalerdietako ligaxkan izango dira, baina galduz gero, beste aukera bat izango dute. Zehazki, bosgarren eta seigarren sailkatuen arteko irabazlearen kontra helduko zaie aukera hori. Partida hori Zumaian (Gipuzkoa) jokatuko dute Urrutikoetxeak eta Albisuk, eta Peña II.ak eta Mariezkurrena II.ak, ostiralean bertan. Lehia erabakigarria, berriz, igandean izango da, Bilbon.

Beraz, zer ikusia izango da datorren asteburuan, baina Irribarriaren agurrak ere emango du zeresana. Larunbatean jantziko ditu azkenekoz galtza zuriak, Donostiako Atano III.ean, eta batek baino gehiagok galdetuko du nola erretira daitekeen goi mailan egonda. Izan ere, atzo erakutsi zuen jokoz onenekin lehiatzeko moduan dagoela, nahiz eta eskuin belaunak oinazeak sortu. Hasi eta buka, erakustaldia eman zuen, era guztietako tantoak egin baitzituen. Lehen zatian erosoago jokatu zuen, Mariezkurrenak berak pilota asko oparitu zuelako. Dena den, 12-10ean kontuak serioago jarri zirenean, bere mailaren berri ederki eman zuen. Hark astindu zuen zuhaitza, eta tanto batean baino gehiagotan zutik ipini zuen Labrit. Defentsan sendo aritzeaz gainera, abiadura bizian ibili zuen pilota ezker eskuarekin, eta batez ere boleaz tanto ikusgarriak egin zituen. Ezin hobeto agurtu zen txapelketa batetik.

Txapelketako beste partida bat ere jokatu zen, Iscarren (Valladolid, Espainia), eta ezustekoa gertatu zen: Jakak eta Arangurenek 22-18 menderatu zituzten Elordi eta Zabaleta. Gaur amaituko da ligaxka, Eibarren (Gipuzkoa): Laso eta Imaz ariko dira Ezkurdiaren eta Martijaren aurka.