Esnal eta Parot askatzearen kontra egin du fiskaltzak

Terrorismoaren kontrako Frantziako fiskaltzak Jakes Esnal eta Ion Parot preso atxikitzeko eskatu du, Bake Bideak ohar batean jakinarazi duenez. Atzo aztertu zituzten Parisko Dei Auzitegian bi euskal presoen baldintzapeko askatasun eskaerak, enegarrenez. Irailaren 22an emanen dituzte erabakiak. «Segurtasunaren ikuspegi soilak itsuturiko magistratuek ez dute euskal auziaren izaera berezia kontuan hartzen», salatu dute Bakegileek.

Ikusi gehiago:Ekhi Erremundegiren analisia: 'Herri koxkorra'

Esnalen kasuan, Frantziako Kasazio Auzitegiak martxoan eman zuen erabakiaren kontra egin du fiskaltzak. Baldintzapeko askatasuna eskatzeko prozeduran, bi erakunderen iritzia eskatzen du auzitegiak: «terrorismoagatik» zigortutakoen eskaerak CPMS Segurtasun Neurrien Diziplina Anitzeko Batzordeak aztertzen ditu, eta kondena luzekoenak, berriz, CNE Frantziako Ebaluazio Zentroak. Batean eta bestean, azterketa bat baino gehiago egiten diote presoari, haren egoera definitzeko eta berriz delituren bat egiteko arriskurik dagoen neurtzeko, besteak beste. Esnalen kasuan, CPMSri eskatu zioten iritzia, baina fiskaltzak kontsideratu zuen CNEren iritzia ere behar zela, eta Parisko Dei Auzitegiak arrazoi eman zion. Frantziako Kasazio Auzitegiak bertan behera utzi zuen erabaki hori martxoan. Fiskaltzaren hitzetan, «gaizki epaitu zuten», eta CNEren iritzia ezinbestekoa zaiola berretsi du, Maritxu Paulus Basurko abokatuak kontatu duenez.

Horrez gain, CPMSk beste iritzi bat eman du, aldi honetan Esnal askatzearen kontrakoa. Haserre mintzatu da Paulus Basurko: «Duela bi urte aldeko iritzia eman zuten, eta erran kartzelan atxikitzeak ez zuela ezer lagunduko, eta momentua zela aldatzeko. Auzitegi berak, presidente berarekin, kontrako iritzia ematen du orain», gaitzetsi du. «Ulertezina» dela erran du. «Gezurrez betea da: erraten dute ETAren armen erdiak ez dituztela itzuli. Hori hark asmatu du». BERRIAk ez du lortu Paroten abokatuarekin mintzatzea.

Bakegileek mobilizazio egun handia iragarria dute larunbat honetarako, gatazka konpontzeko prozesuan Frantziako Gobernuarekin duten blokeo egoera gainditzeko. Ipar Euskal Herri osoko errepide sarea blokeatzeko asmoa dute, Paris mugiarazteko.