Astelehen goizaldean, Ertzaintzak 51 urteko gizon bat atxilotu zuen Donostian, bikotekidearen aurkako sexu eraso bat egitea egotzita. Ertzaintzak adierazi zuenez, atxilotuak emakumearekiko urruntze agindu bat zuen, baina, hori urratu, eta haren etxera joan zen; han egin zion eraso.
Emakumeak eman zion erasoaren berri Ertzaintzari. Hainbat kolpe eta zauri zituen gorputzean, eta ospitalera eraman behar izan zuten. Gizona, berriz, etxean topatu zuten, eta han atxilotu zuten. Epaileek astelehen arratsaldean erabaki zuten kartzelatzea.
Donostiako Udalak erasoa gaitzesteko elkarretaratze bat eginzuen atzo, Alderdi Ederren. Gogor salatu zuen gertaera, eta adierazi zuen horrelako erasoak gure gizartean oraindik nagusi diren indarkeria matxistaren eta genero desberdintasuneko jarreren adierazpenik «higuingarrienak» direla. Bestalde, babesa eta elkartasuna adierazi zien biktimari eta haren ingurukoei.
Beste eraso bat Barakaldon
Donostiakoa ez da izan egunotan salatutako sexu eraso bakarra. Ertzaintzak jakinarazi duenez, 20 urteko gizon bat atxilotu zuten atzo, Barakaldon (Bizkaia), haren bikotekideari sexu eraso bat egitea leporatuta. Goizaldean jazo zen gertaera. Emakumeak larrialdietara deitu zuen, bikoteak eraso egin ziola esanez. Etxebizitzaren patioan aurkitu zuten gizonezkoa, eta bertan atxilotu zuten. Emakumeak kolpeak zituen aurpegian eta lepoan, eta ospitalera eraman zuten.
Bi gizon atxilotu dituzte sexu erasoak egitea egotzita
Donostian eta Barakaldon izan dira erasoak, haien bikotekideen aurka. Elkarretaratze bat egin dute Donostian, gertaera gaitzesteko
![Sexu erasoa gaitzesteko, elkarretaratze bat egin zuten atzo. DONOSTIAKO UDALA. Sexu erasoa gaitzesteko, elkarretaratze bat egin zuten atzo. DONOSTIAKO UDALA.](https://www.berria.eus/uploads/s1/66/16/62/p008-f01.jpeg)
Iruzkinak
Ez dago iruzkinik
Ordenatu