Etxerat-ek Frantziako presondegietan dituzten murrizketak salatu ditu

Osasun egoeraren testuinguruan euskal presoak eta haien senideak Frantziako presondegietan pairatzen ari diren murrizketak salatu ditu Etxerat-ek. Egoeraz ohartarazteko gutun bat idatzi zien, joan den asteazkenean, Frantziako Espetxe Zaintzako kontrolatzaileari eta Arartekoari. Senideei koronabirusaren doako proba azkarrak egitea, familientzat bizitza unitateak zabaltzea, eta larriki eri diren presoak askatzeko eskatu dute.

Urtarril bukaeran iragarri zuen Jean Castex Frantziako lehen ministroak Hegoaldetik Iparraldera pasatzeko beharrezkoa izanen zela PCR proba negatiboa erakustea. Neurri horrek zuzenean eragin die Frantziako presondegietan diren euskal presoen senideei, horietako asko Hego Euskal Herrikoak baitira. Bisita bakoitzerako testa egin beharrak familien gastu ekonomikoak nabarmen handitu ditu, Etxerat-en hitzetan. «Gainera, horien indarraldia zaharkituta geratzen da 24 ordutik gorako bidaiak direnean. PCR garestien ordez, espetxeetara iristean test azkar eta doakoak egitea eskatzen dugu», idatzi dute bi ordezkariei bidalitako gutunean.

Horrez gain, familientzat bizitza unitateak berehala zabaltzeko ere eskatu du Etxerat-ek. Bizpahiru gela dituzten etxetxo batzuk dira horiek, presoei familia bisitak egiteko aukera ematen dietena. 24 eta 48 ordu arteko bisitak egiteko aukera ematen dute, eta urtean behin, 72 ordukoa. Baina pandemia hasi zenetik itxi egin dituzte; beraz, Etxerat-ek ohartarazi du adingabeak diren seme-alaba eta zuzeneko senide askok ezin izan dituztela haien senide presoak bisitatu. «Familia bisitak berreskuratu ahal izateko,etxetxoak berehala berriro irekitzeko eskatzen dugu, osasun eta segurtasun baldintza egokietan» .

Gaixo larriak

Azkenik, larriki eri diren edo 65 urte baino gehiago dituzten presoen egoeraz ohartarazi nahi izan ditu espetxe zaintzako kontrolatzailea eta arartekoa. Horien artean dira Ibon Fernandez de Iradi, Jon Gurutz Maiza, Jon Kepa Parot eta Jakes Esnal. «Pandemiaren testuinguru honetan horien askatasuna lortzeko asmoa izatea eskatzen dizuegu, Osasunaren Mundu Erakundeak edo Nazio Batuen Erakundeak gomendatzen duten bezala».