Gaitzak jota zeuden 31 lagun hil dira astebetean Hego Euskal Herrian

Azken egunetako datuek bistan uzten dute kutsatuen kurba lautu egin dela; are, Gotzone Sagardui Eusko Jaurlaritzako Osasun sailburuak eta Maria Txibite Nafarroako Gobernuko presidenteak ohartarazi dute adierazle batzuek erakusten dutela maldan gorako bidea hartzeko «arriskua» badela. Txertaketa prozesuan aurrera egitea «funtsezkoa» izango da birusaren transmisioaren balantza gorantz ez makurtzeko, baina agintariek azpimarratu dute hori ez dela aski izango izurria kontrolpean izateko, eta neurriak zorrotz betetzeko eskatu dute.

Bereziki ospitaleetako okupazioari eta gaitzarekin loturiko heriotza kopuruari so daude bi administrazioak. Hain justu, izurriak utzitako daturik gordinenetan azken asteetan izandako arintzea eten egin da, eta Hegoaldean gora egin du COVID-19arekin zendu diren pertsonen kopuruak: iragan astean gaitzak jota zeuden 31 pertsona hil ziren, aurreko astean baino bost gehiago. Azken astean birusagatik zendu ziren kasu gehienak Osakidetzak jakinarazitakoak dira, 27 zehazki, eta beste lau Nafarroakoak. Gaitzarekin loturiko heriotza kopuruak apur bat gora egin arren, martxoaren bukaeratik izandako datuen pare dago joan den astekoa.

Ospitaleei buruzko aldagaiek, berriz, apaltzen jarraitzen dute: Osakidetzak eta Osasunbideak emandako azken datuen arabera, guztira 293 paziente dira birusarekin erietxeratuak. Horietako 191 gela arruntetan daude, eta 102, ZIUetan, bezperan baino lau gutxiago. Unitate horiei dagokienez, koska bat beherago da kopurua: martxoaren 31tik Hego Euskal Herrian erregistratutako zenbatekorik apalena da, beraz.

Birusaren transmisioari begira, ordea, etenaldia gertatu da beherako maldan, eta kurba goratzen ari da. Herenegun, 10.678 diagnostiko proba egin ziren Hego Euskal Herrian COVID-19a atzemateko, eta horien guztien %3,9k eman zuten positibo: 426k, alegia. Lurraldeka, 178 Bizkaian atzeman ziren; 110, Gipuzkoan; 88, Nafarroan , eta 45, Araban.

Gainera, Lapurdiko, Zuberoako eta Nafarroa Behereko datuei dagokienez, Frantziako Gobernuko bozeramaile Gabriel Attalek jakinarazi du okertzen ari direla. Izan ere, Pirinio Atlantikoetako Departamenduan intzidentzia%57 handitu da astebetean: 70etik 110era.

Txertaketa, aurrera

Arabako, Bizkaiko eta Gipuzkoako egoerari dagokionez, Sagarduik azpimarratu du izurriaren bilakaeraren adierazleetan «moteltzea» sumatzen dela eta horrek «ziurgabetasuna» eragiten duela. Hala ere, txertaketa prozesuarekin itxaropentsu agertu da, eta iragarri du aste honetan txerto kopuru handia iritsiko dela (Pfizerren 127.530 dosi, AstraZenecaren 61.700, Modernaren 14.400 eta Janssenen 15.600) eta horrek abiadura handia emango diola txertaketari. Aste honetan bertan 49 urtekoei txanda ematen hasi zaie, datorren astelehenetik aurrera txertatzen hasteko. Jakinarazi du, halaber, Osakidetza aurki hasiko dela bizileku baimenik ez duten migratzaileak txertatzen COVID-19aren aurka, eta baita etxerik ez dutenak ere.

Nafarroako txertaketari dagokionez, atzo Pfizer etxearen 18.720 dosi iritsi ziren herrialdera, eta beste 7.450 pertsonari jarri zieten txertoa. Nafarroako Gobernuak jakinarazi duenez, aste honetan 14.500 txerto inguru jarriko dituzte NUPen.