GAZTEAK, MAILA EMATEN
Zalantza handiak piztu zituen uda hastapenean Baionak harrobiko gazteen alde egin izanak. Alain Afflelouk presidentetza utzita, sos faltan gelditu zen kluba, eta, halakoetan ohi den bezala, gazteen alde egin zuen. Orotara, hogei dira lehen taldean ari diren harrobiko gazteak —35 jokalari daude guztira—. Ez da batere kopuru makala, eta, orain arte, gazteak ongi aritu dira.Gazte batek baino gehiagok ardura handiak izan ditu. Iragan sasoian errotutako Rouet, O'Connor, Fuster eta Ugalderen ondoan izen berriak azaldu dira. Deigarriak dira bereziki Etrillard Mugerreko aztalkari gaztearen eta Ollivon hirugarren lerro senpertarraren kasuak. Lehenak ederki jokatu du, eta Roumieu ahantzarazi. Bigarrenak, berriz, Frantziako selekzioaren deia jaso du, bikain aritu ostean.
Hemendik aitzina gazteak mailari eusteko gai izanen diren, hori da galdera. Ugalde, erraterako, gorabeheratsuago ibili da. Baina gibeletik ere badatoz gazteak. Otazo ziburutarra bi urte min hartuta pasatu ondoren itzuli da. Challenge kopan ere Loustalot zuberotarrak eta Sayerese hegalekoak oso itxura ona eman dute. Kontuan hartzekoa da Gayrauden lana ere. Tamalez, belaunean min hartu du, eta udaberria baino lehen ezin izango da itzuli zelaietara.
LIDERRAK ETA
EZUSTEKO ATSEGINAK
Gazteei bidea erakusteko, haien mailan jardun dira Baionako liderrak. Spedding gibelekoak sekulako partidak egin ditu, eta Frantziako selekzioan lekua ere irabazi du, jaiotzez hegoafrikarra izan arren. Rokocoko eta Chisholm ere haien mailan aritu dira. Bustos Moyano gorabeheratsuago jardun da, defentsan batik bat, baina zangoz asko lagundu dio taldeari, joan zen astean Bordeleri irabazitako partidan, kasurako.Baina, agian, azken urteetan pattalago aritu ziren beteranoen iratzartzea izan da berrikuntza handiena. Multzo horretan sartzekoak dira Monribot eta Muller. Hirugarren lerro frantziarra behetik gora joan da. Azarotik hona sekulako maila ematen ari da. Defentsan plakatze eraginkorrak egiten ditu, eta bere lasterraldiekin betetzen duen zelai kopurua harrigarria da. Baionara iritsi zenetik, erdi itzalita jardun da, baina azken asteetan Agenen kapitain izan zeneko sasoia berreskuratu du.
Harroin hegoafrikarrak, berriz, iragan sasoian erakutsitako etengabeko garapenari eutsi dio. Harrabotsik egin gabe, eskuinaldeko uztartzearen jabe egin da. Udan, Jgenti georgiarra ikusten zuen anitzek postuaren jabe. Baina haren buru berokeriek aulkian utzi dute, eta hegoafrikarrak isil-isilik postua irabazi du. Uztartzean sendo dabil, defentsan lan bikaina egiten du, eta bere mugikortasunak protagonismoa eman dio erasoan ere. Horrez gain, minutuak pilatzeko gaitasuna du, eta sarri jokatu du partidako 80 minutuetan.
