Estrasburgoko helegiteak direla eta, Espainiak agindu du 106.000 euro pagatzeko

Egiari Zor fundazioak eman du datua: estatuaren indarkeriaren biktimak izan, Estrasburgora joeta helegitea onartua izan ez zaienen 23 kasutan, biktimek berekordaindu behar izan dituzte prozedura judizialaren kostuak 2019tik. 22.a Joxi Zabalaren familiaren kasua izan da; hori horrela, oraindik beste bat iristea espero du fundazioak. Kostuak ez dira nolanahikoak izan, Egiari Zor-ek nabarmendu duenez: « 22 prozedurengatik, Estatuaren Abokatutzak 106.000 euro baino gehixeago ordaintzeko agindu du».

Egiari Zor-ek gogor kritikatu du jokamolde hori: « Borondate politikoaren kontua da, eta, kasu honetan, estatu terrorismoa jasan zuten biktimei kalte eta min handiagoa sortzeko borondate argia dago». Halaber, galdetu du Estatuaren Abokatutzak irizpide bera izango ote lukeen eskatzaileek jasandako indarkeriaren jatorria «bestelakoa» balitz.

Bidelagunak ere izan dituztela gogoratu dute, ordea: «Eusko Jaurlaritzako Biktimen Zuzendaritzaren laguntza eta aholkularitza izan dugu».

Eusko Jaurlaritzak BERRIAri nabarmendu dionez, diru sail bat badago GALen, Batallon Vasco Españolen eta eskuin muturreko beste talde batzuen biktimek egin behar izan duten bide administratibo eta judizialaren kostu ekonomikoak arintzeko. Zehaztu duenez, Egiari Zor-i 2019an eta 2020an hurrenez hurren 80.000 eta 100.000 euro ematea adostu zuten, «terrorismoaren biktima» izaki ordainik jaso ez eta auzitara jo behar izan duten biktimentzat, «indarkeriazko deliturik» egin ez badute bederen.