Autobus ugari antolatu dituzte herriz herri eta lurraldez lurralde

Larunbatean Bilbon egingo den manifestaziora joateko, hainbat autobus antolatu dituzte lurralde guztietako herri eta hirietan. Esate baterako, antolatzaileek jakinarazi dutenez, Nafarroan 65 autobus beteta zeuden atzo arratsaldean; horietako 20 Iruñerrian. Orain arteko marka guztiak hausten ari dira. Ipar Euskal Herrian ere lau autobus antolatu dituzte oraingoz. Donapaleutik abiatuko da bat, eta Hazparne, Beskoitze zein Donibane Lohizunen egingo ditu geldialdiak. Donibane Garazitik abiatuko da beste bat, eta Kanbon, Uztaritzen, Senperen zein Azkainen geldituko da. Baionatik beste bi aterako dira, eta Donibane Lohizunen ere jendea jasoko dute.

Gipuzkoan eta Bizkaian ere herri eta hiri gehienetan antolatu dituzte autobusak. Izena emateko epea irekita dago.