Gotabaya Rajapaksak dimisioa eman eta gero, Ranil Wickremesinghe azken hilabeteetan lehen ministroa izandakoak Sri Lankako presidente kargua hartu du, behin-behinean. Asia hegoaldeko herrialde hartako konstituzioaren arabera, presidenteak karguari uko egiten badio, lehen ministroa bihurtzen da estatuburu. Rajapaksak atzo bidali zuen dimisioaren gutuna Singapurtik, eta Mahinda Yapa Abeywardene parlamentuko presidenteak adierazi du agerraldi batean jaso duela ukoa eta onartu duela. Wickremesinghek, bide batez, karguaren zina egin du. Parlamentuko buruak jakinarazi du bihar osoko bilkura egingo dutela parlamentuan. Ganbera hilaren 20an da presidente berria aukeratzekoa, nahiz eta, arautegiaren arabera, hilabeteko epea duen horretarako.
Krisi ekonomiko larria pairatzen ari dira Sri Lankan, 1948an Britainiar Inperiotik independizatu zenez geroztiko handiena. Esaterako, elikagaien, erregaiaren eta sendagaien gabezia jasaten ari dira herritarrak. Hori dela eta, azkeneko hilabeteetan protesta masiboak egin dituzte gobernuaren aurka, eta Rajapaksak dimisioa eman du. 1978an sistema presidentzialista ezarri zutenetik karguari uko egin dion lehen presidentea da.
Eta dimititzera behartu duten herritar horiek beraiek kaleak hartu zituzten atzo gauean, ospatzeko, nahiz eta etxeratze agindua ezarria dagoen azken egunetako istiluengatik. Manifestari horiek esana dute ez dutela etsiko Rajapaksa familiak gobernutik alde egin arte, baina Wickremesinghek lotura estua du azken bi hamarkadetan herrialdea gobernatu duen familiarekin, eta ez du adierazi jarduneko lanak eginda presidente izateari uko egingo dionik. Oposizioko buru Sajith Premadasa izan liteke beste presidentegaia.
Ustelkeria, kudeaketa eskasa eta herrialdea porrotera eramatea egozten diote herritarrek Rajapaksari, eta asteazkenean alde egin zuen Sri Lankatik, dimisioa eman aurretik. Larunbatetik dago desagertuta, ehunka herritar haren etxera indarrez sartu eta hura hartu zutenetik. Iturri ofizialek diotenez, bere emaztearekin eta bi bizkartzainekin ihes egin du. Aurrena Maldivetara joan zen, eta handik Singapurrera. Maldivetako Gobernuaren esanetan, Saudi Arabiara iritsi nahi du. Behin karguari uko eginda, immunitatea galdu du, eta toki seguru bat behar du estradizio eskaera posible bat saihesteko. Singapurko iturri ofizialek jakinarazi dute ez duela asilo eskaerarik egin, eta, egitekotan, ez dela «ziurra» emango diotenik.
Basil Rajapaksa Ekonomia ministro ohia eta presidente izandakoaren anaia ere herrialdetik alde egiten ahalegindu da asteon, Kolonbo hiriburu komertzialeko aireportuko iturrien arabera. Bada Sri Lankako Auzitegi Gorenak uztailaren 28ra arte herrialdetik ateratzea debekatu die bai Basil Rajapaksari, bai presidente zenaren beste anaia bati: Mahinda Rajapaksa lehen ministro ohiari, hain zuzen.
NDF, zain
NDF Nazioarteko Diru Funtsak noiz erreskatatuko zain dago Sri Lanka, eta funtseko bozeramaile Gerry Ricek gaur Twitterren adierazi du krisi instituzionala onbideratua izan zain dagoela atzera negoziazioei ekiteko. NDFko ordezkariak ekaineko azken astean izan ziren azkenekoz Sri Lankan, eta erreformak egiteko eskatu zioten gobernuari. Apenas duen erreserbarik nazioartean, eta joan den apirilean kanpo zorraren ordainketa eten zuen.
