Trumpek eragindako buruko mina arindu nahi du EBk Pekinen alboan

Etsaiaren etsaia laguna da. Adituak ez dira ados jartzen txinatarren filosofia ala arabiarrena ote den, baina nazioarteko politikaren habeetako bat dela ez du inork zalantzan jartzen. Europako Batasunak aliatuak nahi ditu Donald Trump basatuaren protekzionismoa geratzen saiatzeko, eta zer hobe haren biktimetako batekin elkartzea baino. Txinarekin batera MME Munduko Merkataritza Elkartea erreformatzeko helburua gauzatu nahi du Bruselak, merkataritzaren orain arteko arau jokoei eusteko. Aldeaniztasuna egonkortu eta protekzionismoa mugatu nahi dute Pekinek eta Bruselak, eta hala helarazi zuten atzoko goi bileran.

Iazko urte bukaeran eta aurtengo ilbeltzean bertan EBk Txinako altzairuari eta burdinari ezarritako muga zerga bereziek txantxak dirudite Etxe Zuriko maizterrak martxan jarritako gerra komertzialaren aldean, eta etsaiaren etsaia laguna da, gainera. Jean-Claude Juncker Europako Batzordeko presidentea eta Donald Tusk Kontseiluko presidentea Li Keqiang Txinako lehen ministroarekin elkartu ziren, eta haren ahotik jakin zuten Pekinek «modu esanguratsuan» erraztuko dituela Europako inbertsioak eta esportazioak. Muga zergak ere gutxituko dituela esan zien Lik.

Aspirina bat Junckerrentzat

Trumpek Atlantikoan eta Pazifikoan zabaldutako fronte bietako arerioak elkarlanerako daudela erakutsi nahi dute Pekinek eta Bruselak, eta duela lau urte martxan zegoen inbertsioetarako itun aldebikoa indartuko dutela jakinarazi zuten. «Uste dugu Txinak gehiago zabal dezakeela bere merkatua», esan zuen Junckerrek. Txinako altzairuak —eta beste hainbat produktuk— Europan dituzten muga zergez ez zuten ezer esan. Baina ikusteko dago Pekinen elkarlan aspirina nahikoa izango ote den Trumpek Europari eragindako buruko mina arintzeko.

Bruselaren kezka ez baita nolanahikoa. Besteak beste, Alemania, Frantzia eta Italiaren hazkunde aurreikuspenak jaitsi ditu aurreko astean, munduko merkataritzaren denboralea gogor jotzen hasi delako ekonomien hazkundean. Donald Tuskek «kaosa» hartu zuen ahotan atzoko goi bilaran. Ez zuen esan kaosa dagoela, hura ez egoteko neurriak hartu behar direla baizik. «Gure begien aurrean munduaren egitura aldatzen ari da, eta gu guztien ardura da aldaketa hori onerako izatea». Gerra komertziala «gatazka bero» bihurtzeko bidean dagoela helarazi zuen, eta azaldu zuen MME erreformatu egin behar zela egoera horri aurre egiteko. «Oraindik garaiz gaude kaosa eta gatazka eragozteko neurriak hartzeko».

Klima aldaketa, energia garbia, munduko merkataritza, Ipar Korea... Agenda zabala izan zuten Europa eta Asiako bloke nagusietako buruzagiek, baina ekitaldia Trump-Putin goi bileraren itzalean egin zuten, Helsinkira begira. Ez alferrik Pekinek aurreko astean jaso zuen Etxe Zuriaren bigarren erasoa. Trumpek %10eko tarifak ezarriko dizkio Txinako beste produktu zerrenda luze bati, 170.480 milioi eurorenak. Eta Europako autoei %20ko muga zergak jartzeko mehatxuak ere hor jarraitzen du.