Txinako armadak ariketa militarrak hasi zituen atzo Txina Ekialdeko itsasoan, Taiwan inguruan, eta gaur ere aritu da horretan. Pekinen arabera, «Taiwango indar separatistak ohartaraztea» dute helburu maniobra horiek. EB Europako Batasunak eta AEBek Txinari eskatu diote ariketa horiek bertan behera uzteko, «tentsioa areagotzea» besterik ez dakartelako. Txinako Atzerri Ministerioak, ordea, gaur erantzun die «Txinaren barne arazo bat» dela «Taiwanen auzia», eta ez duela atzerriko esku hartzerik onartuko. Taiwanen iritziz, nazioarteko ordenari «desafio egiten» ari zaio Pekin, baita eskualdeko egonkortasuna zulatzen ere; bide batez, «berehala» borrokan hasteko ariketa militarrak egiten hasi da Taiwan.
Pekinek jakinarazi duenez, 76 aireontzi, hamabost gerraontzi eta kostazainen lau itsasontzi erabiltzen ari dira uhartearen parean egiten ari diren maniobra horietan. Esaterako, helburu simulatuen kontrako erasoak egiten ari dira. Horren harira, Taiwango armadak berak esan du gaur, agerraldi batean, Txinaren 50 aireontzi detektatu dituztela. 44 itsas milia daude Txinako kostaldearen eta Taiwanen artean, eta ohiko bihurtu dira Pekinen ariketa militarrak, are gehiago azkeneko urtean.
Izan ere, Taiwan 1949tik da independentea, baina Txinak argudiatzen du bere lurraldearen parte duela Taiwan, eta «Txina bakarraren printzipioa» defendatzen du. Pekini iruditzen zaio, gainera, Lai Ching-te Taiwango presidentea independentista dela, eta «nahasmena» duela asmo.
Iazko maiatzean izendatu zuten presidente, eta hasieratik utzi zuen argi Txinarekiko harremanenean statu quo-ari eutsi nahi ziola. Bien elkarrizketa defendatu du, baina nabarmendurik Taiwan ez dagoela Txinaren menpe; bide batez, «duintasunez» jokatzera deitu du. Horrekin lotuta, duela aste batzuk azpimarratu zuen «kanpo indar oldarkor bat» dela Txina, eta «infiltratze» horiei aurre egiteko neurriak agindu zituen. Hain zuzen, adierazpen horien ondoren heldu dira Txinaren ariketa militarrak.
Pekinek uste du ariketak zilegiak eta beharrezkoak direla, «subiranotasun eta batasun nazionala defendatzeko». Iruditzen zaio, bide batez, modu horretan armadaren gaitasuna frogatzen dutela.
Filipinen kexa
Filipinetako agintariek salatu dute —Taiwanen hegoaldean dago herrialdea— Txinako «ikerketa ontzi bat» Filipinetako uretan sartu dela. «Ohartarazten ari gatzaizkio dauden eremuan ez dagoela baimenduta itsas ikerkuntza». Indiak, esaterako, gisa horretako Txinako ontziek Sri Lanka inguruan nabigatzea debekatu du, susmoa baitu Pekinek espioitzarako erabiltzen dituela.
Txinak, berriz, AEBei egozten die eskualdean sua piztu nahi izatea, Washingtonek aipatu duelako Filipinei F-16 gerra hegazkinak eta 5.500 milio dolarreko —5.000 milioi euro inguru— ekipamendu militarra saltzea. «Nor ari da tentsioa sortzen eskualdean?», galdetu du gaur Txinako Atzerri Ministerioko bozeramaile batek.
