Raul Khajimba oposizioko buruak irabazi ditu bozak Abkhazian

Okerrik ezean, Raul Khajimba izango da Abkhaziako presidente berria. Orain arte oposizioko buru izandakoak alde handiarekin irabazi ditu iragan den asteburuko hauteskundeak: behin-behineko emaitzen arabera, botoen %50,57 lortu ditu, Aslan Bzhania segurtasun zerbitzuetako buruak baino hamalau puntu gehiago. Parte hartzeak aise gainditu zuen Hauteskunde Batzordeak ezarritako gutxieneko maila: bozketa baliozkoa izan zedin, erroldatuen erdiek eman behar zuten botoa, eta, azkenean, %70ek baino gehiagok hartu dute parte.

Propio aurreratutako hauteskundeak izan dira. Aurreko estatuburuak, Aleksandr Ankvabek, ekainean eman zuen dimisioa, bere aurkako protestek estututa. Kritikoek kudeaketa txarra eta ustelkeria egozten zizkioten lehendik ere, eta maiatzaren 29an parlamentuaren konfiantzazko botoa galdu zuen. Diputatuen aulkietatik ez ezik, oposizioak kalean ere eskatu zion kargua uzteko, eta manifestazio jendetsuak antolatu zituen egun haietan. Dimisioaren ostetik hauteskundeetara deitu zuten, eta hautagai guztiek sistema politikoa erreformatzeko akordio bat sinatu zuten: haren arabera, hainbat alderditako «profesionalek» eta hautagaien jarraitzaileek osatuko dute gobernuko koalizioa.

15 urte aitorpenik gabe

Praktikan errepublika independentea da Abkhazia, nahiz eta soilik lau estatuk jotzen duten independetetzat. 1999an aldarrikatu zuen Georgiarekiko independentzia, eta 2008an jaso zuen ofizialki Errusiaren aitorpena —Georgiaren aurkako gerraren ostetik heldu zen Moskuren deklarazioa—. Gerora gauza bera egin dute Nikaraguak, Venezuelak eta Nauruk. Mendebaldeko gobernu nagusiek, ordea, ez diete baliorik aitortzen horko hauteskundeei.

Hautagai guztiek agindu dute Errusiarekiko harremanaren alde lan egingo dutela. Moskuk base militar bat ere badauka Abkhazian.