Benjamin Netanyahu Israelgo lehen ministroak atzo adierazi zuen Gazan «presioa» areagotzekoak direla, eta azken erabakiak bide horretan doaz. Izan ere, Rafahn —zerrendaren hegoaldean— dauden palestinarrei handik alde egiteko agindu die gaur Israelgo armadak. «Armada berriro ari da indar handiz eraso egiten, erakunde terroristen gaitasuna bertan behera uzteko», nabarmendu du, ohar batean.
Israelek su etena hautsi zuen joan den martxoaren 18an, eta ordutik ia mila palestinar inguru hil ditu —63.000, azkeneko hamazazpi hilabeteetan—, Gazako iturri ofizialek diotenez. NBE Nazio Batuen Erakundeak joan den astean kaleratutako datuen arabera, jada zerrendaren %20 inguru hutsarazteko agindua emana du Israelek. Tel Avivek esan die Rafahn daudenei Al-Mawasi errefuxiatu gunera jotzeko, baina Israelek argi erakutsi du, 2023ko urrian zerrenda setiatzen hasi zenetik, ez duela bereizketarik egiten helburuen artean, eta berdin-berdin egiten duela errefuxiatu guneen eta ospitaleen kontra ere, esaterako.
Israelgo lehen ministroak atzo ohar batean esan zuenez, horren bitartez Hamasek armak uztea nahi dute. Are, azpimarratu zuen talde islamistako kideei utziko dietela zerrendatik alde egiten, baldin eta amore ematen badute. Netanyahuren ustez, horrek modua emango luke «Trump plana» ezarri ahal izateko. Aintzat hartu behar da Donald Trump AEBetako presidenteak zera planteatu duela, Gazan dauden bi milioi palestinarrak lekualdatzea, gero zerrenda gune turistiko bihurtzeko.
Bitartean, hura gupidarik gabe bonbardatzen segitzen du Israelek, eta atzo, Eid-al-Fitregunean —ramadanaren amaierako ospakizuna—, gutxienez 64 gazatar hil zituen Israelek, zerrendako iturri ofizialek esan zutenez. Atzo, gainera, Palestinako Ilargi Gorriko zortzi kideren gorpuak topatu zituzten Rafahn, hondarretan lurperatuta. Osasun zerbitzu horrek ohar batean jakinarazi zuenez, aurreko igandean, hilaren 23an, Israelgo armadak eraso egin zien anbulantzietan zihoazela. Bonbardaketa horretan Babes Zibileko sei kide eta NBEko langile bat ere hil zituzten, eta horien gorpuak ere atzo aurkitu zituzten.
'Qatargate' auzia
Palestinako Ilargi Gorriak salatu du eraso egin zietela laguntza humanitarioa ematen ari ziren bitartean, erakunde horren ikurra aldean eraman arren. Yunis Al-Khatib presidenteak atzo Zisjordanian emandako prentsaurreko batean azpimarratu zuenez, nazioarteko zuzenbide humanitarioak beren jarduna babesten du, eta Israelek badaki hori. Bide batez, nazioarteari belarrietatik tira egin zion: «Beren begien aurrean behin eta berriz gertatzen dira krimen horiek, baina ez dira ari neurri eraginkorrak hartzen nazioarteko zuzenbidearen urraketa nabarmen horiek saihesteko».
NBEk ere gertatutakoa salatu du. OCHA Gai Humanitarioak Koordinatzeko Nazio Batuen Bulegoaren Palestinarako ordezkari Jonathan Whittallek nabarmendu du osasun zerbitzuek ezin dutela «gerra helburu» izan. «Bizitzak salbatzera etorri ziren, eta hobi komun batean daude orain», idatzi du mezu batean, sare sozialetan. Palestinako Atzerri Ministerioak adierazi du gertatutakoa gerra krimen bat dela, eta, hori horrela izanik, Israelek nazioartean kontuak eman beharko lituzkeela.
Bestalde, Israelgo Poliziak Netanyahuren bi kolaboratzaile atxilotu ditu, Qatargate auziaren ikerketaren barruan. Ikertzen ari dira ea Qatarrek dirurik ordaindu ote zien, 2022an antolatutako futboleko Munduko Koparen herrialde horren alde kanpaina egin zezaten Israelgo hedabideetan. Efe berri agentziari Israelgo Poliziak baieztatu dionez, Netanyahu deklaratzera deituko dute.
Shin Beteko buru berria izendatu du Netanyahuk
Benjamin Netanyahu Israelgo lehen ministroak Eli Sharvit armadako komandante ohia izendatu du Shin Bet zerbitzu sekretuetako buru, lehen ministroaren bulegoak gaur ohar batean jakinarazi duenez. Kontuan hartu behar da Ronen Bar aurreko burua kargugabetu zuela martxoaren 21ean, harengan konfiantzarik ez zuela argudiatuta. Barrek erabaki horren kontrako helegitea jarri zuen Auzitegi Gorenean; hain zuzen, helegiteaz ebatzi aurretik izendatu dute Sharvit.
