NBEk Moskuri egotzi dio Ukrainako kultura «ezabatzea» Donbassen

NBE Nazio Batuen Erakundeko hiru kontalarik Errusiari atzo leporatu zioten «Ukrainako kultura, historia eta hizkuntza ezabatu nahi izatea» herrialde horretako hego-ekialdeko eremu okupatuetan; besteak beste, Donbassko eta Krimeako lurraldeetan. NBEk salatu zuenez, «errusiarrek haien identitatea ordezkatu nahi dute identitate ukrainarrarekin».

Erakundeko hiru kontalarik kaleratutako oharrean salatu zutenez, Errusiak kontrolatutako Luhansk, Donetsk, Txernihiv eta Sumi hirietako liburutegietan zeuden Ukrainako literaturari buruzko liburuak «suntsitu dituzte, muturrekoak zirelakoan».

Era berean, NBEk salatu zuen irakasleak, eskolako zuzendariak eta erakunde publikoetako beste funtzionario batzuk atxilotu zituztela, Errusiatik bidalitako gaitegiak hezkuntzan txertatzeari uko egiteagatik, «Errusiako lurraldetik etorritako ehunka irakasle Ukraina ekialdean lan egiteko errekrutatuak izan diren bitartean».

Oharraren arabera, bestalde, Krimeako komunitate tatarraren kultura «desagerraraztea» salatu zuten ekintzaile askok, eta eurek «jazarpena, mehatxuak eta atxiloketak» pairatu zituzten.