Microsoftek atzo arratsaldean jakinarazi zuen bere zerbitzuetako asko erori zirela, eta hainbat orduren ostean, «ezkutuan» zen arazoa konpondu eta beren onera itzuli dira zerbitzu horiek. Teknologia konpainiak barkamena eskatu die bezeroei: «Badakigu zer-nolako konfiantza duten gure zerbitzuekiko, eta seriotasunez hartzen dugu ardura hori». Azaldu du darabilten sarea eguneratu dutela berriki, eta orduan sortu dela «arazo teknikoa»; gertakariari buruzko txosten bat kaleratzekoa da. Etenaldiak mundu osoan izan du eragina; batez ere Outlook eta Teams aplikazioetako erabiltzaileei eragin die.
Teamsen, esaterako, taldeetako oinarrizko deiek eta mezularitza sistemak funtzionatu dute sarea erorita egonda ere. Baina erabiltzaileek ezin izan dituzte egutegian bilerak programatu edo ikusi, ezta zuzeneko ekitaldiak sortu ere. Outlooken, berriz, zailtasunak izan dituzte aplikazioan sartzeko, eta sartzea lortu dutenek arazoak izan dituzte mezu elektronikoak bidaltzeko.
Hasieran, enpresak aitortu zuen posta elektronikora sartzeko arazoak detektatu zituela AEBetako erabiltzaileetan. Eta ordu batzuk geroago iragarri zuen arazo hori munduko hainbat herrialdetara zabaldu zela. Gaur, Microsoftek berak baztertu egin du zibereraso bat jasan izana. Charles Lamanna Microsoften zuzendariorde exekutiboak zabaldu du oharra, X sare sozialean: «Oraingoz, baieztatu dezaket ez dagoela zantzurik pentsatzeko arazoa jarduera maltzur edo zibernetiko batek eragin duela». Azaldu duenez, azpiegituran «karga handia» dagoelako gertatu da etenaldia.
Hainbat herrialdetan izan du eragina Microsoften arazoak. Asian, esaterako, hainbat gobernutako bulegoen, banketxeen, epaitegien eta enpresa pribatuen jardunak eten ditu Microsoften arazoak. Erresuma Batuko Gobernuak, berriz, jakinarazi du kalteak jasan dituela Microsoften etenaren ondorioz. Besteak beste, adierazi du lankidetzan ari dela Microsoftekin, gobernuaren zerbitzuetan izan duen eragina aztertzeko, eta nabarmendu du «kontingentzia plan bat» ere badaukatela, «etenaldiak minimizatzeko».
Urtebetean bigarren aldiz erori dira Microsoften zerbitzuak. AEB Ameriketako Estatu Batuetako enpresak orduko hartan azaldu zuen matxuratutako zerbitzariak doitu zituztela. Baina bigarren arazoak agerian utzi du ez zela nahikoa izan, eta zalantzan utzi du zerbitzuaren fidagarritasuna.