Sarona merkataritza gunean izan da bart gaueko erasoa. Bi ekintzailek tiroka hil dituzte lau pertsona, eta beste lau zauritu. Erasoa izan eta gutxira, bi palestinar atxilotu ditu Poliziak, erantzuleak direlakoan. Haietako bat erietxera eraman behar izan dute, zaurituta. Iturri ofizialek azaldu dutenez, tiroketa izan eta ordu gutxira, ustezko bi erasotzaileen gertuko hainbat lagun atzeman dituzte, Hebronen eta inguruetan. Horretaz gain, militarrek inguratuta daukate Yatta herria —hangoak dira ustezko bi ekintzaileak—.
Israelgo Gobernuak, segurtasun arrazoiak argudiatuta, Israelen sartzeko debekua ezarri die 83.000 palestinarri, ramadanak irauten duen artean. Tarte horretan, Zisjordaniako Lurralde Okupatuetan eta Gazan bizi diren palestinarrak ezin izango dira sartu Jerusalemen, eta ezta hegaldirik hartu ere. Garai hau baliatzen dute Gazako ehunka palestinarrek Israelen menpeko lurretan bizi diren senideak ikusteko, baina, debekuaren ondorioz, mugak itxita edukiko dituzte.
Hamaseko eledun Hussam Badranek nabarmendu du erasoak argi uzten duela huts egin dutela erresistentzia amaitzeko Israelen ahaleginek. Al-Fatahek, berriz, nabarmendu du Israelen indarkeriari emandako "erantzun naturala" direla erasoak.
"Ekintza terrorista"
Israelgo lehen ministro Benjamin Netanyahuk gogor gaitzetsi du erasoa, eta salatu du "hilketa terrorista" izan dela. Orain, larrialdiko bilera egiten ari da Israelgo Gobernua, hurrengo urratsak zein izango diren aztertzeko.
