Behin-behinean espetxean sartu dute iragan ostiralean Berlinen bilbotar bati labanaz eraso egiteagatik atxilotutako gizona. Karlsruheko epaitegi federalean izan da gaur 19 urteko gizonezkoa, eta hango instrukzio epaileak eman du espetxeratzeko agindua, Alemaniako Fiskaltza Nagusiaren eskaerari erantzunez.
Fiskaltza nagusiak hartu du bere gain auziaren ikerketa. Leipzigen (Alemania) bizi den 19 urteko errefuxiatu bat da ustezko erasotzailea. Eta fiskaltza nagusiaren ustez, «islamismo erradikala eta antisemitismoa» egon litezke erasoaren atzean.
Duela astebete gertatu zen erasoa. 30 urteko gizon bilbotar bat Berlingo Holokaustoaren Memoriala bisitatzen ari zela lepoan sastakatu zuten. Larri eraman zuten erietxera, baina ebakuntza egin zioten, eta, jada ez dago arriskuan. Astelehenean jakinarazi zutenez, hobera egin zuen, eta erietxeko gela arrunt batera eramatekoak ziren.
