Azken urteetako emaitzarik txarrenak izan ditu LDP Alderdi Liberal Demokratikoak Japoniako Parlamenturako bozetan. Gobernuan aliatu izan duen Komeito alderdiarekin batera 215 eserleku lortu ditu Shigeru Ishiba gaur egungo lehen ministroak, bere buruari helburu gisa jarritako 233etatik urrun; hori da, hain zuzen, gehiengo osoa lortzeko behar den kopurua. Ondorioz, gehiengorik gabe geratu da gobernuburua, baina iragarri du, halere, ahalegina egingo duela agintean jarraitzeko, eta beste aliatu bat bilatzen saiatuko dela horretarako, «konfiantza galdu» arren haiek izan baitira «boto gehien lortutako alderdiak». 2009tik aurreneko aldiz ez du hauteskunde batzuetan gobernatzeko gehiengoa lortu —izan bakarrik, edo Komeito ohiko bazkidearekin batera— Japoniako alderdi kontserbadore hegemonikoak.
Ishidak berak ez du zehaztu norekin ahaleginduko diren gobernua osatzeko babesa lortzen. Baina aitortu du herritarrek argi esan dutela LDPk «hausnarketa sakona» egin behar duela. Krisi ekonomikoa eta LDPren finantzaketari lotutako ustelkeria kasuak izan dira, besteak beste, alderdiaren gainbeheraren arrazoiak. Galera horrek mesede egin dio oposizioko alderdi nagusiari, CDP Alderdi Konstituzional Demokratikoari: 148 eserleku eskuratu ditu, aurrez zituenak baino 98 gehiago. Baina gehiengo osotik urrun hura ere.
Lehen ministroak ahalegina egin beharko du zentro-eskuineko Herriarentzako Alderdi Demokratikoarekin edo Japoniako Berrikuntzaren Alderdia populistarekin akordioak egiteko, agintean jarraitze aldera. Izan ere, inor gutxik espero du oposizioko taldeek gehiengoa berenganatzeko adinako akordio zabal bat erdietsi ahal izatea. Dena den, CDPko buru Yoshihido Nodak nabarmendu du bozetako emaitzek argi utzi dutela «garai berri baten hasiera» dela hau, eta LDPk ezin duela agintean jarraitu. Hala, iragarri du oposizioko gainontzeko alderdiekin hitz egingo duela «gobernu aldaketa behartzeko».
Japoniako Konstituzioaren arabera, alderdiek 30 eguneko epea dute koalizio bat osatzeko, baina, emaitzak kontuan izanik, pentsatzekoa da agintea eskuratu asmo duten alderdiek ahaleginak eta bi egingo dituztela akordio hori ahalik eta azkarrena erdiesteko.
