Yoav Gallant Israelgo Defentsa ministro ohiaren ustez Israelen gailendu den «iluntasun morala» dago bere kargugabetzearen atzean. Benjamin Netanyahu Israelgo lehen ministroak gerra estrategian «desadostasunak» zituztela aipatu zuen atzo; Gallantek, berriz, desadostasun horiek aletu ditu: komunitate ultraortodoxoa, bahitu eta presoen arteko trukaketak eta ikerketa batzorde bat eratzeko eskaera. Milaka israeldar kalera irten dira bart, erabakiaren aurka protesta egiteko.
Erlazionatuta
Gallantek Tela Aviven eginiko hitzaldi batean eman du bere bertsioa, eta hiru arrazoi horiek aipatu. Aurrenekoak dirudi nabarmenena, esan baitu komunitate ultraortodoxoa aurrerantzean ere soldaduskatik salbuetsita egoteko legea «ustela» dela. Haren ustez, salbuespen hori onartezina da, ikusita Israelek zer erronka izango dituen etorkizunean: «Ezin dugu onartu lege baztertzaile bat onestea eta, hala, milaka lagun gerraren zama eramatetik salbuestea».
«Ezin dugu onartu lege baztertzaile bat onestea eta, hala, milaka lagun gerraren zama eramatetik salbuestea»
YOAV GALLANTIsraelgo Defentsa ministro ohia
Ultraortodoxoak —hau da, harediak— Israelgo herritarren %14 dira, eta, egun, ez daude behartuta armadara joatera. Komunitate hori urtez urte handitzen ari da, gainera, eta asko gazteak dira. Bestalde, haien eskubideak defendatzen dituzten alderdiak funtsezkoak dira Netanyahuk gehiengoari eusteko. Halere, Israelek soldadu asko behar ditu Gazako inbasioarekin aurrera jarraitzeko, eta pribilegio horri buruzko eztabaida publiko egin da azken hilabeteetan. Gallantek jendaurrean esana zuen 7.000 gazte ultraortodoxo deitzeko asmoa zuela.
Gallantek aipatu duen bigarren arrazoia preso palestinarren eta bahitu israeldarren trukaketa da. Gallanten ustez, egiteko modukoa da hori, eta, amore ematea «mingarria» izan arren, Israelek ahalegina egin beharko luke bahituak etxeratzeko: «Aurkakoa egitea zera litzateke, Israeli Kainen markak ezartzea», alegia, anaiari traizioa egitea.
%14Komunitate ultraortodoxoa Israelek 9,5 milioi biztanle ditu, haietatik %14 judu ultraortodoxoak. Komunitate hori handitzen ari da, eta, soldaduska egiteko legezko adinean dagoen populazioaren lagina hartuz gero, %24 dira. Soldaduska egitetik salbuetsita daude, ordea.
Iazko urriaren 7ko gertakariei buruzko ikerketa batzorde nazional bat osatzeko aukera, horixe da Gallant eta Netanyahuren arteko hirugarren desadostasun handia. Gallant halako bat osatzearen aldekoa da, «egia argitara atera dezan», eta, aditzera eman duenez, lehen ministroak hainbatetan oztopatu du asmo hori.
Netanyahuk atzo kendu zuen kargutik Gallant, eta Israel Katz Atzerri ministroa jarri haren ordez. Netanyahuren alderdikoa da, soka berekoa, eta ez du zerikusirik Gallanten ahots kritikoarekin. Gobernuaren bazkide ultraortodoxoek ontzat jo dute kargugabetzea; beraz, ez dirudi erabaki horrek Gazako kanpaina leunduko duenik.
Greba zibilera deitu dute
Erabakia polemikoa da, eta milaka israeldar kalera atera dira bart Gallanten alde egiteko. Netanyahu irailean ere saiatu zen Gallant kargutik botatzen, eta orduan gertatu bezala, manifestazio handiak antolatu dira Jerusalemen eta Haifan, erabakia gaitzesteko. Tel Aviven, esaterako, poliziak berrogei pertsona atxilotu ditu, eta ur kanoiak erabili manifestazioak desegiteko.
Protestek gau osoa iraun dute, eta Hamasek bahituriko israeldarren senideek protagonismo handia izan dute. Haiek buru zituzten manifestazioek hainbat errepide eta autobide moztu dituzte. Horietako batean, alderdi laboristako aholkulari bat atxilotu du Poliziak. Deitzaileek «greba zibilera» deitu dute, bihartik hasita: «Ez diegu itxarongo sindikatuei eta eragile ekonomikoei: bihartik aurrera herrialde osoa geldituko dugu».
