Oldarraldia gero eta nabarmenagoa da Ekialde Hurbilean. Israelek, ostiralean, Hezbollah milizia xiitako bi buruzagi hil zituen Beiruten, eta eraso berean 45 lagun hil zituen gutxienez, Libanoko Gobernuaren arabera. Horri erantzuteko, gaur goizaldean Israelen aurkako ehun suziri inguru jaurti ditu Hezbollahk, baina atzeman egin dituzte gehienak. Berehala etorri zaio buelta: miliziak Libanon dituen zenbait base bonbardatu ditu Israelek, eguna argitu bezain pronto.
Israelgo armadak argi utzi du miliziaren aurkako erasoek jarraitu egingo dutela eta gero eta gehiago izango direla. Atzo ere egin zituen zenbait eraso, Hezbollah suziriak botatzeko prestatzen ari zela jakinda.
Libanokoa, gainera, ez da Israelgo armadaren fronte bakarra. Gaur gauean, soldadu talde bat Al-Jazeera albiste kateak Ramallahn (Zisjordania) duen egoitzara sartu da; itxi egin du, eta bertako materiala eraman.
