Martxoaren 18an Gazarako menia hautsi zuenetik, Israelek erasoak areagotu ditu zerrendan. Duela bi aste, martxoaren 19an, Tel Avivek iragarri zuen lurreko operazioei ekingo ziela berriro, eta egunak igaro ahala, presioa handituz joan da. Horiek horrela, gaur goizaldean Israelgo Defentsa ministro Israel Katzek jakinarazi du lurreko erasoak areagotu dituztela. Are gehiago, Israelgo armadako irratiak kaleratu duenez, ministroak baieztatu du Rafahraino heldu direla soldaduak; hau da, zerrenda hegoalderaino.
Israelgo hedabideek azken orduetan kaleratu dutenaren arabera, Israelgo Gobernuaren helburua zerrendan lur gehiago kontrolatzea da. Katzen hitzak aipatuz argitaratu dutenez, «arintze guneak» handitu nahi ditu Israelek: «Terroristek kontrolatzen dituzten azpiegitura eta lurretara joango dira tropak, lurralde zabal bat hartuko dute, eta gero Israelgo Estatuaren segurtasun eremuei anexionatuko zaie lurralde hori». Israelgo Gobernuak indarra eta ezpata izena jarri dio operazio berri horri, eta nazioarteko hedabideek argitaratu dutenaren arabera, Gazako lurren %25 hartzea du helburu.
Benjamin Netanyahu Israelgo lehen ministroak arratsaldean jakinarazi du armadak zerrendaren hegoaldeko korridore baten kontrola hartu duela; eta hala, isolatuta dutela Rafah. «Zerrenda zatitzen eta presioa areagotzen ari gara, bahituak askatu ditzaten», esan du Netanyahuk haren bulegoak zabaldutako bideo batean
Azken egunetan Gaza hegoaldearen aurka abiatutako erasoaldien segida da lurreko erasoak ia zerrenda osora hedatu izana. Izan ere, Katzek hori jakinarazi baino lehen, lehen ministroak Gazan «presioa» areagotzeko eskatu zuen asteburuan, eta Israelgo armadak Rafahtik alde egiteko agindu zien han dauden palestinarrei.
42 hildako
Lurreko operazioen bidez ez ezik, airez ere ari da erasoan Israel. Al Jazeera Qatargo hedabideak kaleratu duenez, gaur goizaldean hamalau palestinar hil ditu Israelgo armadak zerrenda hegoaldean. Hedabideak Gazan dituen kazetariek jakinarazi dutenez, bi bonbardaketa egin ditu Tel Avivek hegoaldean: bat Rafahn —bi lagun hil dituzte—, eta beste bat Khan Yunisen —hamabi lagun hil dituzte—. Martxoaren 18an menia hautsi zuenetik 1.042 palestinar hil dirtu Israelek Gazako hegoaldean, zerrendako Osasun Ministerioaren arabera. Horiek horrela, Rafahn zein inguruko eremuetan dauden herritarrei handik ihes egiteko agindu die Israelgo armadak.
Horiek ez dira gaurko eraso bakarrak izan, Al Jazeerak jakinarazi duenez, gutxienez 72 dira gaur Israelgo armadak hil dituen gazatarrak. Horietako hemeretzi, Israelek UNRWA Palestinar Iheslarientzako Laguntza eta Lan Bulegoak Jabaliako errefuxiatu esparruan duen klinikari egin dion erasoan hil dira.
%95Israelen erasoek Gazako zenbat eskola kaltetu dituzten, ehunekotan. Israelek 2023ko urriaren 7an Gazaren aurkako erasoaldia abiatu zuenetik, zerrendako eskolen %95ek nolabaiteko kalteak pairatu dituzte erasoetan. Unicef Haurren Laguntzarako Nazio Batuen Funtsak, Save the Children-ek eta Gazako beste hainbat erakundek gaur kaleratu duten txostenaren arabera, Gazan guztira zeuden 564 eskoletatik 406k «zuzenean» jasan dituzte Tel Aviven erasoak. Gainera, 85 eskola «guztiz suntsiturik» daude. Israelek erasoaldia hasi zuenetik palestinarrek eskolak erabili izan dituzte babesleku gisa.
