Israelgo armadak bonbardaketa batzuk egin ditu gaur Siria hegoaldeko Daraa eskualdean, eta eraso horietan gutxienez bost pertsona hil ditu, eta hainbat zauritu. Horixe jakinarazi dute hango iturri ofizialek. Horien arabera, Israelgo armada eskualdearen mendebaldeko lurretan sartu da —Israelen mugakidea da—, eta jarraian, tanke batzuetatik, artilleria erabili dute bonbardaketak egiteko. Israelgo armadak ohar batean esan duenez, bestalde, «terrorista batzuek» suzko armak baliatuta egindako erasoari erantzunez iritsi dira bonbardaketak.
Joan den abenduan Baxar al-Assad Siriako presidentea (2000-2024) erorarazi zutenetik, Israelek hainbatetan bonbardatu du herrialde hura, argudiatuta bonbardatutako posizioetan Al-Assaden armak daudela; edo, bestela, saihestu egin nahi dutela eremu batzuk Hezbollah Libanoko milizia xiitaren esku geratzea.
Herrialdearen hegoaldean eraso bat egin aurretik, ordea, goizaldean, 05:15 zirela, Siria erdialdeko Tadmur eta T4 base militarrak ere bonbardatu ditu Israelek. Siriako Giza Eskubideen Behatokia GKE gobernuz kanpoko erakundearen zenbaketa aintzat hartuta, Al-Assad erorarazi eta Ahmed al-Xaraak herrialdearen agintea hartu zuenetik, Israelek 39 aldiz aldiz eraso egin dio Siriari —gehien-gehienetan airez—, eta, gaurkoak aintzat hartuta, 22 pertsona hil ditu.
NBE Gazan
Eta Siriari eta Gazari ez ezik, Libanori ere eraso egiten dio Israelek. Tel Aviveko iturri ofizialek ohar bidez jakinarazi dutenez, Hezbollahko buruzagi bat hil dute gaur herrialdearen hegoaldean, bonbardaketa batean.
Bestalde, NBE Nazio Batuen Erakundeak Gazako zerrendan duen taldea txikituko du, Israel berriro zerrendari eraso egiten hasi delako: martxoaren 18an menia hautsi zuenetik 792 pertsona hil ditu han, zerrendako Osasun Ministerioaren arabera. Stephan Dujarric NBEren bozeramaileak atzo iluntzean nabarmendu zuenez, 100 pertsonako taldea murriztuko dute, eta 30 inguruk handik alde egin beharko dute, «noiz eta beharrizan humanitarioak nabarmen areagotu diren honetan».
