Beirut hegoaldeko Dahieh auzoa jomugan jarri du berriz ere Israelgo armadak. Gaur Tel Avivek Libanoko hiriburuko auzune horretan egindako eraso batek gutxienez lau pertsona hil ditu, eta beste zazpi zauritu, Libanoko Osasun Ministerioaren arabera. Israelgo armadak, ohar bidez, azaldu du erasoaren helburua Hezbollahko miliziano bat zela, Hamasi zenbait erasotan lagundu ziona. Israelek Libanoko talde xiitaren indargunetzat du Dahieh, eta azken bost egunetan bi aldiz bonbardatu du. Ostiralean beste hiru pertsona hil zituen gune horretan. Eraso haren ostean, Hezbollahko buru Naim Qasemek ziurtatu zuen su etenari eusteko asmoa zuela, baina iradoki zuen Israelek Libanori eraso egiten jarraituz gero talde xiitak erantzun egingo diola. Iazko azaroaren 27an sinatu zuten menia Israelek eta Hezbollahk —AEBak, Frantzia eta Libano izan ziren bitartekariak—.
Libanoko presidente Joseph Aunen ustez, Israelen erasoa «ohartarazpen arriskutsua» izan da. Presidentearen bulegoak zabaldutako oharraren arabera, Aun nazioarteari zuzendu zaio, eta eskatu dio berma diezaiotela Libanori «subiranotasunerako eskubidea». Gainera, jakinarazi du neurriak hartuko dituela Israeli bonbardaketak egiten jarraitzeko «aitzakiak» ematen dizkienen aurka. Bi urte pasa egon da Libano presidenterik gabe, eta urtarrilaren 9an hartu zuen kargua Aunek.
2023ko urrian Israelek Gazako erasoaldia gogortu zuenetik iazko azarora bitartean, Hezbollahren eta Tel Aviven arteko gatazka are eta gehiago gaiztotu zen. Tarte horretan, Israelgo armadak maiz bonbardatu zuen Dahieh auzoa. Hain zuzen, gune horretan egindako eraso batean hil zuen Hezbollahko lider Hassan Nasrallah, tregoa adostu baino bi hilabete lehenago.
Su etena adostu ondoren ere, Tel Avivek libanoarrei eraso egin izan die tarteka. Urtarrilaren 26an, esaterako, etxera itzultzen ari ziren 22 desplazatu hil eta 124 zauritu zituen, tiroz. Eta martxoaren 22an, sei pertsona hil zituen, herrialdearen hegoaldean egindako hainbat aire erasotan. Gainera, otsailaren 18an, Tel Avivek jakinarazi zuen Libanoko bost lekutan ez zituela soldaduak kenduko, nahiz eta menia akordioan zera adostu zuten, su etena indarrean sartu eta 60 egunera, Israelek tropak aterako zituela Libano hegoaldetik. Eta joan den ostiralean, lau hilabeteko tregoaren ostean lehen aldiz, Israelek Beirut bonbardatu zuen.
Egun hartan, Tel Avivek argudiatu zuen Israelera hainbat suziri jaurti zituztela Libanotik, eta horri erantzuteko bonbardatu zituela Beirut eta Libano hegoaldeko zenbait eremu. Hezbollahk, berriz, ukatu egin zuen Israeli eraso egin izana, eta talde xiitako buruak larunbatean berretsi zuen eutsi egiten diola menia sinatu zuenean hartutako «konpromisoari». Halere, ohartarazi zuen Israelgo armadak Libanori eraso egiten jarraituz gero Hezbollahk «beste bide batzuk» ibili beharko dituela.
Iparraldea ere husteko agindua
Israelek, baina, ez dio soilik Libanori egiten eraso. Sirian ere egin ditu bonbardaketak azken asteetan, eta Gazan, martxoaren 18an menia hautsi zuenetik, mila pertsona baino gehiago hil ditu, zerrendako Osasun Ministerioaren arabera. Gaur, Israelgo armadak Gazako iparraldea husteko agindu du.
Beit Hanun eta Beit Lahia hirietako eta beste hiru auzotako biztanleei «azken abisua» eman die armadak, sare sozialetan. Beren bizitokiak utzi, eta Gaza hiriko aterpeetara joateko agindu die gaur goizean. Eta ohartarazi du armada erasoak egiten hastear dela eremu horietan.
Hain zuzen, Israelgo armadak zerrendaren hegoaldea husteko agindu eta biharamunean heldu da iparraldea ebakuatzeko agindua. Atzo, Rafah hirian zeuden palestinarrei agindu zieten handik alde egiteko.
Shin Beteko buruaren hautaketan, atzera
Benjamin Netanyahu Israelgo lehen ministroak atzo hautatu zuen Shin Bet zerbitzu sekretuetako buru berria, baina atzera egin du. Atzo, lehen ministroaren bulegoak esan zuen Eli Sharvit armadako komandante ohia aukeratu zuela Netanyahuk Shin Beteko buru, baina gaur goizaldean jakinarazi du «beste hautagaitza batzuk» aztertuko dituela. Bulegoak zabaldutako oharrak ez du argitu zergatik egin duen atzera lehen ministroak. Atzo, Israelgo Gobernuko zenbait kidek kritikatu egin zuten Sharviten hautaketa. Izan ere, komandante ohiak Netanyahuren administrazioak onartutako erreforma judiziala kritikatu izan du.
Martxoaren 21ean kargugabetu zuen Netanyahuk Ronen Bar Shin Beteko aurreko burua, harengan konfiantzarik ez zuela argudiatuta. Barrek erabaki horren kontrako helegitea jarri zuen, eta epaileek oraindik ez dute errekurtsoaz ebatzi.
3Israelgo armadako zenbat soldadu atxilotu dituzten «bandalismoa» egotzita. Zisjordaniako Jinba herrian larunbatean egindako sarekada batean «bandalismo» ekintzak egin izana leporatuta, Israelgo armadak hiru soldadu zigortzea erabaki du. Astebete igaro beharko dute espetxe militar batean, armadak bart zabaldutako oharraren arabera. Komunikatuak dioenez, militarrek kalteak eragin zituzten sarekada egin zuten guneetan; hala nola hainbat eskolatan eta osasun zentro batean. Hareetz Israelgo egunkariaren arabera, sarekada hartan 140 israeldar inguruk hartu zuten parte —militarrak eta kolonoak—, eta sei palestinar zauritu zituzten.
