Huthiek Tel Aviv bonbardatu dute gaur goizaldean, eta Israelgo iturri ofizialek baieztatu dute eraso horretan pertsona bat hil dela eta lau zauritu. Yemengo matxino xiitek adierazi dute misil balistiko bat eta lau drone jaurti dituztela. Ohar batean zehaztu dute «helburu inportante bat» zutela jomugan. Israelen arabera, droneetako bat AEBek Tel Aviven duten enbaxadaren eraikinetik gertu erori da.
Israelek punta-puntako aireko defentsa sistemak ditu, baina, «giza hutsegite baten» ondorioz, ezin izan dute drone bat erorarazi, armadaren bozeramaile Nadav Shoshanik ohar batean jakinarazi duenez. «Alarmek ez dute Tel Aviven jo, ez zeudelako aktibatuta». Huthien esanetan, jaurti dituzten droneak, Yafa izenekoak, gai dira «etsaiaren» sistemak saihesteko.
Azken hilabeteetan, Israelen kontrako bonbardaketak areagotu dituzte huthiek. Azaroan hasi ziren zamaontzi batzuei eraso egiten, Itsaso Gorrian, argudiatuta Israelekin lotura zutela. Eraso horiei eutsi diete orduz geroztik, eta, gainera, Haifako portuari ere (Israel) eraso egin diote, besteak beste. Dena den, gaurkoa da Tel Aviven aurkako aurreneko bonbardaketa.
