Bakutik Grozni Txetxeniako hiriburura hegaldia egiten ari zen hegazkin batek lurra jo du Kazakhstanen, eta 38 bidaiari hil dira istripuan. Hasiera batean, Azerbaijango Fiskaltzak gutxienez 32 pertsona bizirik atera direla adierazi badu ere, Reuters berri agentziak, Kazakhstango agintariak iturri gisa aipatuz, jakinarazi du 29 izan direla istriputik bizirik irten direnak.
Azerbaijango hiriburutik atera da hegaldia, eta herrialde horretako agintariek bidaiarien zerrenda argitaratu dute. Horren arabera, 62 bidaiari zituen hegaldiak, eta tripulazioko bost kide ere baziren. Hau da, guztira 67 pertsona zeuden hegazkinean.
Azerbaijan Airlines hegazkin konpainiaren hegaldia zen, eta 190 bidaiarirentzako lekua zuen hegazkinak. Guztiz txikituta geratu da Aktaun (Kazakhstan) lurra jo eta gero. Azerbaijanek argitaratu duenaren arabera, bidaiari gehienak azerbaijandarrak ziren (37), hamasei errusiarrak, sei Kazakhstangoak, eta hiru Kirgizistangoak.
TASS Errusiako albiste agentziak Grozniko aireportuko bozeramaile baten adierazpenak jaso ditu, eta esan du ohiko hegaldi bat zela, baina helmuga bi aldiz aldatu dutela behe lainoagatik. Hasieran, Makhatxkalara lekualdatu dute (Dagestango Errepublika, Errusia), eta gero, Aktaura.
