Sute handi bat gertatu zen ostegun gauean Valentzian (Herrialde Katalanak). 2007an amaitutako etxebizitza bloke bi ziren, 138 apartamentuko zeuden horietan, eta kiskalita geratu dira. Etxe batean piztu ziren garrak, baina haizea zakar ibili zen arratsalde osoan, eta oso bizkor zabaldu zen sua fatxada guztian, era bortitzean. Ostiral arratsaldean agintariek jakinarazi dute sutearen ondorioz hildako bederatzi pertsona aurkitu dituztela, eta horiei ondoren aurkitu duten beste bat gehitu zaie. Hamar dira denera.
Hasieran, dudak izan dira nagusi. Goizerako esana zuten lau zirela hildakoak, baina desagertuta-eta bazeuden hainbat bizilagun ere, eta haien berri izan artean kopuruan gorabeherak izan zitezkeela onartu dute tokiko agintariek. Gero, arratsaldean, Poliziak baieztatu du bederatzi direla hildakoak; hamargarren hildakoa desagerturik zegoen hartara. Hamabost zauritu ere eragin ditu suteak, baina denak onerako bidean daudela jakinarazi dute.
«Kalitate goreneko materialekin» eginda zeudela esanez saldu ziren etxebizitza horiek. Orain dudak zabaldu dira fatxadaren materialaren inguruan. Guztiak su zer azkar hartu zuen ikusita, material suharberarekin eginda zegoen susmoa dago. Gertatutakoa argitze aldera, ikerketa bat abiatu du Valentziako epaitegi batek. Sekretupean dago sumarioa.
