Kalte handiak eragiten ari da denboralea Frantzian eta Alemanian. Bigarren horretan, hamar pertsona hil dira uholdeetan joan den igandeaz geroztik. Simbach herrian (Bavaria), esaterako, dagoeneko bost gorpu atera dituzte lokatz artetik.
Frantzian, kalteak ez dira horren handiak izan, baina alertan daude herrialdeko hamahiru departamendutan —horietatik hamabitan alerta laranja ezarri dute, eta batean gorria—, eta dagoeneko hildako bat eragin dute euriteek. Parisen arazoak izan dituzte trenbide sarean, eta hainbat tartetan itxi egin dute zerbitzua. Horretaz gain, Louvreko museoa ere itxi egin dute, eta beheko solairuetan zeuden hainbat artelan toki seguruagoetara eraman dituzte.
François Hollande presidenteak iragarri du datorren asteko ministroen kontseiluan "natur hondamendi" izendatuko dituztela kaltetutako inguruak.
