Kaledonia Berrian hamar lagun hil dira maiatzean liskarrak hasi zirenetik. Noumeako Fiskaltzak jakinarazi duenez, Jendarmeriak gizonezko bat hil du hegoaldean, Mont-Dore komunan. Nouvelle-Caledonie La Premiere hedabidearen arabera, tiroketa bat izan zen gizonezkoaren eta polizien artean, eta hala hil zuten. Le Monde egunkariak, berriz, gehitu du errepide bat «desblokeatzeko» operazio batean jazo zela.
Ikusi gehiago
Bi hilabete baino gehiago igaro dira Kaledonia Berrian liskarrak hasi zirenetik, hauteskunde errolda zabaltzeko egindako proposamenaren harira. Independentistek salatu zuten herri indigenaren aurkako erabaki bat zela, eta, Frantziako Asanblearako bozetarako deia egin ostean, erroldaren egitasmoa bertan behera utzi zuen Emmanuel Macron Frantziako presidenteak.
Halere, protestak ez dira eten. Maiatzetik hamar lagun hil dituzte, eta kalte material ugari izan dira. Mobilizazioak, gainera, areagotu egin ziren independentisten aurkako zenbait polizia operazioren ostean. Hamahiru lagun atxilotu dituzte hilabeteotan, protestetan liskarrak «sustatzea» egotzita, eta horietatik zenbait Frantziako espetxeetara lekualdatu zituzten, Kaledonia Berritik 17.000 kilometrora. CCAT Lur Gaineko Ekintzak Koordinatzeko Taldeko kideak dira horiek.
