Martxoaren 18an, Israelek berriz ekin zien lurreko erasoei Gazan, eta ordura arte luzatu zuten su etena hautsi, Israelen eta Hamasen arteko negoziazioak ez aurrera eta ez atzera egonagatik ere. Atzo, herrialdeko Defentsa ministro Israel Katzek adierazi zuen are gehiago areagotuko zituztela erasoak; azken orduetan, Israelek gutxienez ehun palestinar hil ditu zerrendan, Al Jazeera hedabidearen arabera.
Horien artean, bederatzi Gaza hiriko Xujayea auzoan izan dira, eta hamabost lagun ere zauritu dituzte. Palestinako Wafa berri agentziak jakinarazi duenez, zerrenda hegoaldeko Khan Yunis hirian ere gutxienez bederatzi lagun hil dituzte, eta hiru, berriz, iparraldeko Beit Lahia hirian. Al Bureikh zerrenda erdialdeko errefuxiatuen esparrua ere bonbardatu dute, Filastin egunkari palestinaren arabera, baina ez dute hildakoen berririk eman.
Ez dirudi erasoek baretzera egingo dutenik, Israelgo armadako bozeramaile batek Gaza hiriko hainbat auzo ebakuatzeko agindu baitu sare sozialetan, «azpiegitura terroristak txikitzeko» helburuz.
Siria, bonbardatuta
Gazan ez ezik, Israelek Siria ere bonbardatu du gaur gauean; ia hogei eraso egin dituzte herrialdeko bost eskualdetan, Siriako Atzerri Ministerioaren arabera. Herrialdearen erdialdean dagoen Hama hiriko aireportu militarra «ia guztiz suntsitu» dute, eta gutxienez lau militar hil dituzte, eta beste hamabi zauritu.
Hego-mendebaldeko Daraa eskualdeko Nawa hirian, bederatzi siriar hil dituzte erasoen ondorioz, Al Jazeerak eskualdeko agintariak aipatuz kaleratu duenez. Israelek okupatuta duen Golango Gainarekin egiten du muga Daraak. Hango Tasil hiriari ere eraso egin diote; «hainbat terrorista» hil dituzte han, Israelgo armadaren arabera.
