Gutxienez beste 24 pertsona hil ditu Errusiak Ukrainan

Erasoaldi masibo bat egin du Errusiako armadak Ukrainako zenbait lekutan. Zelenskiren hitzetan, Errusiaren erasoa «Ukraina osoko energia sistemaren aurkakoa» izan da. Ohartarazi du balitekeela orain arte zenbatu baino hildako gehiago egotea.

Errusiak Pryluky hirian suntistu duen eraikina, gaur goizean. SERHII OKUNEV / EFE
Errusiak Pryluky hirian suntistu duen eraikina, gaur goizean. SERHII OKUNEV / EFE
Beñat Mujika Telleria.
2026ko urriaren 7a
17:45
Entzun 00:00:00 00:00:00

Errusiako presidente Vladimir Putinek 74 urte bete ditu gaur, eta Ukrainaren aurkako beste erasoaldi masibo bat eginez abiatu du urtebetetze eguna. Gutxienez 24 pertsona hil dira eraso horietan. Volodimir Zelenski Ukrainako presidenteak erasoaldiaren berri eman duenean hemeretzi ziren hildakoak, zibilak denak. Baina ohartarazi du litekeena zela orduak igaro ahala hildako gehiago agertzea. Zelenskik azaldu du Errusiaren erasoa «Ukraina osoko energia sistemaren aurkakoa» izan dela, eta misilak eta droneak erabili dituela horretarako.

Atzo gauean jakinarazi zuen Ukrainako presidenteak Errusia herrialde haren aurkako erasoaldi masibo bat prestatzen ari zela, eta hala izan da. «Gure energia azpiegiturak jo nahi izan dituzte», adierazi du Zelenskik sare sozialetan. Gainera, Ukrainako Gobernuak Telegram bidez esan du Kiev eskualdeko zentral termiko nagusiari berriro egin diola eraso Errusiako armadak —bigarren aldiz jo dute aste bakarrean—. 

Hildakoetako hemezortzi Xerniguiv eskualdeko Pryluky hirian zenbatu dituzte, horietatik lau adingabeak. Zelenskik adierazi duenez, Errusiak bost pisuko eraikin bat suntsitu du airez eraso eginda, eta beste 26 lagun zauritu dituztela ere esan du, tartean bost haur. Hala ere, ohartarazi du balitekeela hildako eta zauritu gehiago egotea hondakinen artean harrapatuta.

Beste bi lagun Poltava eskualdeko Kremenchuk hirian hil ditu Errusiak; beste bi, Kiev hiriburuan, eta beste bi, Kirovograd eskualdeko Oleksandria hirian. «Krimen krudelenetako bat da. Nire doluminak hildakoen familiei eta gertukoenei», adierazi du Ukrainako presidenteak sare sozialetan. 

Kievek adierazi duenez, hiriburuan eta beste hamabi eskualdetan egin du eraso Errusiak bart. Zelenskik, gainera, zehaztu du Errusiako armadak 70 misil erabili dituela erasoaldi masiboa egiteko, «horietako asko balistikoak». Defentsa sistemak 44 misil eta 117 drone eraitsi dituela zehaztu du Kievek, baina herrialdeko hemezortzi puntu jo dituztela baieztatu du.

Zelenskik hainbat aldiz errepikatu du Ukrainak arazoak dituela Errusiaren misil balistikoak gelditzeko, eta gaur ere horixe idatzi du sare sozialetan: «Errusiaren misil balistikoak gure erronka nagusietako bat dira oraindik» —Ukrainak uda honetan utzi dio Errusiak bere erasoetan erabiltzen dituen misil balistikoen kopuruaren berri emateari, azkenaldian geroz eta misil gutxiago eraisten ari baitziren—. Era berean, ohartarazi du Ukrainarentzat «ezinbestekoak» direla aireko defentsa fardelak, eta Europako aliatuei gogorarazi die laguntza behar dutela Patriot defentsa sistemarekin. Izan ere, Kieven arabera, sistema hori da Errusiaren erasoei «bermeekin» erantzuteko gai den bakarra. 

Errusiako Defentsa Ministerioak bere gain hartu du Ukrainaren aurkako erasoaldia, eta, azaldu duenez, helburuen artean zeuden, besteak beste, Kieveko eta beste eskualde batzuetako «gune militar eta industrialeko enpresak» eta Odesako «portuko eta ontziak konpontzeko azpiegiturak». Moskuk, gainera, zehaztu du Dnipro hiriko Makarov enpresa aeroespaziala eta Poltava eskualdeko Kremenchuk hiriko bi enpresa ere jo dituela. Ohar batean zehaztu dutenez, misilak, droneak, jaurtigailuak eta munizioa ekoizten zituzten enpresa horiek.

Bestalde, Errusiako estatu indarrek jakinarazi dute Ukrainak jaurtitako 311 drone suntsitu dituztela goizaldean herrialdeko zenbait lekutan. «Baita Itsaso Beltzean, Azov itsasoan eta Krimean ere», gaineratu dute. Azken eremu hori 2013an anexionatu zuen Moskuk.

EBren «obsesio» militarrak

Errusiak EB Europako Batasunaren «militarizazio planak» gaitzetsi ditu gaur. Hain justu, Frantziako armadak urpeko nuklear berri batekin misil jaurtiketa probak egin eta biharamunean, Dmitri Peskov Kremlineko bozeramaileak esan du «argi eta ozen» jaso duela Emmanuel Macron Frantziako presidentearen mezua: «Gure ustez arazoak elkarrizketaren bidez konpondu behar dira, eta ez misil erakustaldiak eginez».

Gainera, EB bloke ekonomiko izatetik bloke «politiko-militar» izatera pasa dela gaitzetsi du Peskovek, eta talde komunitarioaren segurtasun eta defentsa politikak Errusiari aurka egitera bideratu dituztela.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA