Fiskaltzak ez dio errekurtsoa jarriko Traperoren epaiari

Espainiako Auzitegi Nazionaleko Fiskaltzak ez dio helegiterik aurkeztuko Josep Lluis Trapero Mossos d'Esquadraren buru ohia absolbitu duen epaiaren kontra. Fiskaltzak azaldu duenez, sententzia aztertu ostean ondorioztatu du helegite batek ez lukeela aurrera egiteko aukerarik izango, «absoluzio epaien kontrako helegiteei ezartzen zaizkien legezko mugak direla eta». Beraz, irmoa izango da Auzitegi Nazionalak hartu zuen erabakia.