Fillon ofizialki inputatu du justiziak, diru publikoa bidegabeki erabiltzeagatik

François Fillon LR Errepublikanoak alderdiko presidentegaia ofizialki inputatu dute lanpostu faltsuen kasua ikertzen ari diren hiru instrukzio epaileek. Hirurek pisuzko akusazioak egin dizkiote Frantziako eskuinaren presidentegaiari, horretarako «nahikoa» zantzu daudelakoan: diru publikoa bidegabeki erabiltzea, sozietate ondasunak bidegabe erabili izana ezkutatzea eta konplizitatea, eta bizi publikoaren gardentasunerako aginpide gorenaren aurrean deklaratzeko betebeharra urratzea.

Dena den, erabakia jakina zen hilabete hasieratik, baina egun bete aurreratu dute magistratuek jakinarazpena, berez gaur zutelako hitzordua finkatua. Penelope Fillon emazteak lanik egin gabe diru publikoa jaso zuela zabaldu zuen Le Canard Enchaîné astekariak urtarrilean, eta horren harira abiatu zuten ikerketa. Atzo goizean Fillonen aurkako informazio gehiago publikatu zuenLe Parisien egunkariak: haren seme-alabek parlamentuko laguntzaile gisa jasotako sariaren zati bat itzuli zioten. Zehazki, Fillonen alabak 2005 eta 2006 urteen artean irabazitako 33.000 euro itzuli zizkion —sariaren %70—, eta semeak irabazitako sariaren %30. Frantzian senideak lana ematea ez da legez kanpokoa —577 diputatuetatik 95ek hala egiten dute—; bai, ordea, diru publikoa jasotzea egin ez duten lan batengatik.

Fillonek atzo deklaratu zuen hiru epaileen aurrean, eta «inpartzialtasuna» eskatu zien, beste edozein herritar bezala tratatzeko. Ordea, ez zien magistratuen galderei erantzun. Kasua azaleratu zenetik egin bezala, atzo ere defendatu zuen bere emaztearen lana: «Zenbait lekukok baiezta dezakete», azaldu zuen Fillonek, Le Figaro egunkariak jakinarazi duenez.

Atzoko prozeduraren ostean, balizko epaiketa baterako lehen pausoa egin du justiziak. Apirilaren 23an eta maiatzaren 7an egingo dira presidentetzarako bozetarako bi itzuliak, eta Fillon inoiz baino susmagarriago aurkeztuko da. Presidentegaiak hainbatetan ziurtatu duenez, justiziaren erabakiak ez du errudun bilakatzen, eta hauteskundeetara aurkezteko zilegitasun «osoa» du, primarioak irabazi zituelako.

Faboritoa zen urtarril arte

Urtarrilean lehertu zen kasua, eta harrez geroztik, Eliseorako bidean faborito zenak babesa galdu du boto-emaileen artean eta alderdi barruan; inkesten arabera, ez du bigarren itzulira sailkatzeko aukerarik.

Eskuinaren inoizko porrotik handiena saihesteko —beti sailkatu da bigarren itzulirako—, Alain Jupperen hautagaitza berpizten saiatu ziren hainbat alderdikide, alferrik. Bitartean, haren kanpaina utzi zuten hainbat goi kargudunek, tartean bere kanpaina zuzendari Patrick Stefanini eta Thierry Soler bozeramailea.