Europako herrialdeek lehen aldiz ariketa militarrak egingo dituzte Ukraina babesteko

Boluntarioen Koalizioko hamar herrialdetako tropek hartuko dute parte. Polonian egingo dituzte, azaroaren 9tik 22ra. Atzo Errusiak banaketa gune baten aurka egindako erasoan hildakoak 31 dira jada, eta gaur Kharkiveko ospitale bat jo du.

Ukrainako armadako bi militar urriaren 27an, Kramatorsken. MARIA SENOVILLA / EFE
Ukrainako armadako bi militar urriaren 27an, Kramatorsken. MARIA SENOVILLA / EFE
Aitor Garmendia
2026ko azaroaren 3a
12:00
Entzun 00:00:00 00:00:00

Lehen aldiz ariketa militar bateratuak egingo ditu Nazio Anitzeko Ukrainarako Indarrak. Europako hamar herrialdetako tropek hartuko dute parte Boluntarioen Koalizioak bultzatutako ariketa horietan; Polonian egingo dituzte, datorren astelehenetik azaroaren 22ra arte. Frantziak eta Erresuma Batuak gidatuta, Boluntarioen Koalizioko kideek osatzen dute Nazio Anitzeko Ukrainarako Indarra, eta haren helburua da bermatzea Ukrainan «bakea mantentzen» dela su eten bat adosten denean.

2.800 soldadu elkartuko dira Koalicja deituriko ariketa militarretan —koalizio, polonieraz—. Alemaniak, Belgikak, Erresuma Batuak, Espainiak, Estoniak, Frantziak, Herbehereek, Lituaniak, Poloniak eta Suediak bidaliko dituzte tropak; Turkiak itsasoko ariketak gidatuko ditu, baina ez du militarrik bidaliko. 37 herrialdek osatzen dute Kievi laguntza ematea helburu duen koalizio hori, eta gehienak Europakoak dira.

Horrekin guztiarekin lotuta, Ukrainako agintariek gaur berritu dute atzo laguntza banatzeko gune batean egindako erasoan hildakoen kopurua; guztira 31 pertsona hil zituen Errusiak, Zaporizhia eskualdean egindako erasoaldi horetan. Gaur, beste 73 zauritu dituzte Kharkiven, ospitale bat bonbardatuta. Volodimir Zelenski Ukrainako presidenteak azaldu duenez, erasoak «zuzenean» jo du Kharkiv hiriko ospitale bat, eta kardiologia departamentuan kalteak izan dira. Gainera, Moskuk herrialdeko gune askotan azpiegitura energetikoen aurkako erasok ere egin dituela gaineratu du. Besteak beste, Zhitomir eskualdean 180.000 pertsona baino gehiago argindarrik gabe geratu direla jakinarazi du eskualde horretako gobernadoreak.

ukraina
Txikitutako gela bat Kharkiveko ospitalean, gaur. SERGEI KOZLOV / EFE

Bien bitartean, Kieven aliatuak ariketa militarrak hasteko prestatzen ari dira. Frantziak eta Erresuma Batuak iazko otsailean sortu zuten Boluntarioen Koalizioa, Ukrainari laguntza emateko asmoz. Kieven aliatuen talde horretako herrialde batzuek, orain, lantalde militar bat osatuko dute. Parisko kuartel batetik gidatuko dituzte ariketak, jeneral britainiar batek eta haren laguntzaile frantziarrak.

Frantziako Defentsa Ministerioak ohar batean azpimarratu du ariketa horien helburua dela ikustea zenbait herrialdek «zer abiadatan eta zenbaterainoko eraginkortasunez» hedatu ditzaketen beren tropak Ukrainari babesa emateko, «behin erasoaldiak amaitutakoan».

Halere, Parisek zehaztu du Nazio Anitzeko Ukrainarako Indarrak ez duela balizko menia hori gainbegiratzeko erantzukizuna izango. Eta gaineratu du ez dela NATO Ipar Atlantikoko Itunaren Erakundearen pean egongo. Hain zuzen, Boluntarioen Koalizioak indar armatu hori sortzea erabaki zuten AEBek esana dutelako ez daudela prest Ukrainan tropak hedatzeko.

Eraso ere egin dezakete

Nazio Anitzeko Ukrainarako Indarraren helburua «defentsa» bada ere, Europako herrialdeetako tropa horiek Moskuren eraso bati erantzuteko aukera izango lukete «bere buruaren defentsan». The Guardian Erresuma Batuko egunkariak iturri ofizialak aipatuz kaleratu duenez, su etena indarrean sartuz gero, Errusiako armadak tropa europarrei eraso egiten badie, horiek erantzuteko aukera edukiko lukete.

Iturri horrek gaineratu duenez, Nazio Anitzeko Ukrainarako Indarra ez da AEBetako teknologiaren menpekoa izango; besteak beste, esan du ez dutela Elon Musken Starlink sistema erabiliko. Azken asteetan sistema horrek huts egin duela salatu izan du Kievek. Urriaren erdialdean, Reuters berri agentziak kaleratu zuen AEBetako Defentsa Departamentuak agindu bat jaso zuela Ukrainako militarrei Starshield zerbitzua moteltzeko. Space X enpresaren Starlink satelite bidezko Internet zerbitzuaren erabilera militarrerako bertsioa da Starshield.

errusia eta txina, «inoiz baino hurbilago»

Andrei Belousov Errusiako Defentsa ministroaren arabera, Pekinen eta Moskuren arteko akordio estrategikoa «inoiz baino indartsuagoa» da. Gaur Pekinen egindako bilkura baten osteko adierazpenetan, Belousovek argitu du bi herrialdeen arteko akordioen oinarrian Vladimir Putin Errusiako presidentearen eta Xi Jinping Txinakoaren arteko elkarrizketak daudela. Eta Zhang Shengmin Txinako armadako jeneralak gaineratu du bi presidenteek «gidalerro berriak» adostu dituztela eta gaurko bilera «urrats bat» izan dela gidalerro horiek indarrean jartzeko.

Azken asteetan tenkatu egin da Kieven eta Washingtonen arteko harremana, baina Etxe Zuriak bitartekari jarraitu nahi du Ukrainaren eta Errusiaren artean. Horretarako, negoziazioei berrekin nahi die —otsailetik etenda daude—. Eta bart, Steve Witkoff Etxe Zuriaren ordezkariak jakinarazi du negoziazio bilera batzuk egingo dituztela azaroaren 10ean eta 11n, Abu Dhabin. Bilkura horietan, Vladimir Medinski izango da Errusiako ordezkaritzaren burua, Vladimir Putin presidentearen aholkularia.

Witkoffek esan du AEBetako ordezkariak Frantziako, Erresuma Batuko, Alemaniako, EB Europako Batasuneko eta NATOko kideekin bilduko direla aste honetan, Bruselan. Eta Zelenski Friedrich Merz Alemaniako kantzilerrarekin batzartuko da gaur, Berlinen. 

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA