Italiako eskuin muturraren gorakada nahikoa eta soberakoa izan da parlamenturako hauteskundeak irabazi eta gobernua eskuratu dezan. Botoen %43 inguru eskuratu ditu koalizio eskuindarrak, behin-behineko emaitzen arabera. Giorgia Meloni FDI Italiako Anaiak alderdi ultraeskuindarrak gora egin du bozetan —botoen %4 eskuratu zituen duela laur urte; orain, laurdenak baino gehiago—.
Ikusi gehiago:Ultraeskuindarrak buru dituen gobernu bat aldarrikatu du Melonik
Europan, beso zabalik hartu du eskuin muturrak Meloniren garaipena. Mateusz Morawiecki Poloniako lehen ministroa ez da batere berandutu, eta gauerdian bertan zoriondu du FDIko burua, lehen emaitzen berri izan bezain laster. Alderdi biak ala biak daude ECR Europako Kontserbadore eta Erreformisten koalizioan Europako Parlamentuan. Talde komunitarioko eztabaidei begira, Melonik argi du zeintzuk izango diren bere aliatuak.
Marine Le Pen Frantziako RN Batasun Nazionalaren buruzagi ohi eta Asanbleako diputatua ere gogobeteta agertu da Italiako bozen emaitzarekin. Meloni eta Lega alderdiko buru Matteo Salvini zoriondu ditu Le Penek, «Europako Batasuna antidemokratiko eta harroputz baten mehatxuei aurre egiteagatik». Italiarrek «gobernu abertzale eta subirano» bat aukeratu dutela ere gehitu du mezuan.
Hungariako lehen ministro Viktor Orbanek ere FDIko burua goratu du sare sozialetan; «merezitako garaipena» lortu duela adierazi du. Orbanen Fidesz alderdiko kideek ere izan dute tarterik eskuin muturreko koalizioa zoriontzeko. «Gure helburuak komunak dira: bakea eta familiei laguntzea, [eta] gure mugak babestea», adierazi du Szilard Nemeth alderdiko presidenteordeetako batek. Balazs Orban lehen ministroaren politika zuzendariak ere ohartarazi du «inoiz baino gehiago» lagundu behar dituztela «ikuspegi komun bat» dutenak.
Espainiako Vox alderdiak ere bide beretik jo du, eta komunikatu baten bitartez adierazi du «Italiak nazio aske eta subiranoen Europa berri baterako bidea finkatu» duela. Antzera mintzatu da Juan Guaido Venezuelako oposizioko liderra, Meloni zorionduz. Halaber, Guaidok eskerrak eman dizkio FDIko liderrari Venezuelaren askatasuna «babesteagatik».
Balantzaren beste aldea
Italiar ultraeskuinaren garaipenak Europako hautsak errotu ditu, eta, aliatuak bezala, bestelako iritzidunak ere izan dira. Espainian ere, gobernuko presidenteorde Yolanda Diazek esan du emaitza «tristeak eta kezkagarriak» direla. Dena dela, ez du etsi; «alboan beharko dugu Italia Europa sozialago eta demokratikoago bat eraikitzeko, Hungariaren eta Poloniaren bideari jarraitu ez diezaion», erantsi du. Espainiako Atzerri ministro Jose Manuel Albaresek FDIren garaipena gaitzetsi du, eta haren ondorioez ohartarazi: «Populismoak beti hauspotzen dira, eta beti berdina dute amaiera: hondamendia. Iraganera itzultzearen aldeko apostua egiten dute».
Frantzian, Elisabeth Borne lehen ministroak azaldu duenez, «erne» izango dira giza eskubideak errespetatu daitezen bai Italian, bai Europako Batasuneko kide diren estatuetan. Are gehiago: abortu eskubidea nabarmendu du eskubideen artean. Horrez gainera, ez du ezer esan parlamenturako hauteskundeen inguruan.
Bestalde, Europako Batzordea neutral agertzen saiatu da. Eric Mamer bozeramaileak azpimarratu du ez dagokiola batzordeari Italiako kanpainaz iruzkinik egitea. Haren lana gobernuekin elkarlanean aritzea dela azaldu du, eta oraingoan ez dela «desberdina izango». Talde komunitarioko eztabaidei dagokienez, iritzi dio «hauteskunde hauetan Europari buruzko epaiketa moduko bat ikustea muturreko sinplifikazioa» dela.
