Gaur goizean egin du bilera Espainiako Estatuko Kontseiluak, eta gai bat izan du mahai gainean: atzo Kataluniako Parlamentuak egindako arau aldaketaren kontra Auzitegi Konstituzionalera jotzeko aukera. Mariano Rajoyk eskatu zion txostena atzo, urgentziaz, eta Kontseiluak erantzun dio badagoela nahiko arrazoi helegite hori jartzeko. "Baldintza berdinetan parte hartzeko eskubidea" urratzen du arau berriak, Kontseiluaren arabera.
Arau aldaketarekin erreferendumerako legea azkar onartzeko aukera du parlamentuak. Espainiako Gobernuak iragarria zuen bere esku dagoen guztia egingo duela galdeketa hori egin ez dadin, eta horretan ari da. Bihar bilera egingo du Espainiako Gobernuak, eta litekeena da han erabakitzea arau aldaketaren kontrako helegitea jartzea Konstituzionalean. Rafael Catala Espainiako Justizia ministroak atzo iragarri zuen helegitea jarriko dutela aukera izanez gero.
Guardia Zibila bere kabuz
Espainiako Gobernuak erreferendumari bidea ixteko modu bila jarraitzen duen bitartean, Guardia Zibilak presio egiten jarraitzen du. Bartzelonako 13. Instrukzioko Epaitegiaren ikerketaren barruan ari dela esanda bi galdeketa egin zituen atzo, eta Jaume Clotet Generalitateko Komunikazio arduraduna galdekatu du gaur. Nolanahi ere, epaitegi horrek jakinarazi du berak ez duela agindu galdeketa horiek egiteko, eta Guardia Zibila bere kabuz ari dela.
Jaume Clotet lekuko gisara deitu dute, eta galdeketaren erdian inputatu egin dutela esan diote. Orduan, deklaratzeari uko egin dio Clotetek. Nolanahi ere, Guardia Zibilak ez du inor inputatzeko eskumenik; epaileari proposatu behar dio, eta epaileak erabaki.