Mendebaldeak «nazioartearen markoa» ezartzeko orduan duen «monopolioa» bukatzeko «beharra» dagoela uste du Moskuk. Izan ere, Sergei Lavrov Errusiako Atzerri ministroak atzo nabarmendu zuen «Nazio Batuen Erakundearen Gutunak» eskatzen duenaren kontrara Mendebaldeak ez duela kontuan hartzen «interesen oreka», eta jarrera «berekoia» duela.
Lavrov Errusiako atzerri politikaz mintzatu zen behe ganberan, eta Mendebaldeari egotzi zion Errusia «kolapsora» eraman nahi izatea. Iruditzen zaio, gainera, «AEBen eta sateliteen» asmoa ez dela soilik «guda zelaian garaitzea» eta Errusia «herrialde paria baten modukoa» bihurtzeko intentzioa ere badutela. Beraz, Mendebaldeko herrialdeek osatutako ardatzaren alternatiba gisa aurkeztu zuen Errusiaren eta Txinaren arteko aliantza, eta gaineratu Mosku «lankidetza estrategiko bakan eta pribilegiatu bat» garatzen ari dela Indiarekin.
Bestalde, atzo amaitu zen NATO Ipar Atlantikoko Itunaren Erakundeko kide diren estatuetako Defentsa ministroek Bruselan egindako bilera, eta Jens Stoltenberg aliantza militarreko idazkari nagusiak nabarmendu zuen aliatuek ez dutela adostu beste konpromisorik defentsan gastatu beharrekoaren inguruan. Iruditzen zaio, hori bai, «nabarmena» dela kideek «gehiago» gastatu beharko luketela arlo horretan. 2014an beren BPG barne produktu gordinaren %2 gutxienez gastu militarrerako baliatzea adostu zuten aliatuek, baina horien artean dozena bat inguruk baino ez dute hori egiten —29 herrialde daude NATOren barruan—.
Eta horrekin lotuta, Suediak eta Finlandiak atzo adierazi zuten beren helburua dela «ahalik eta lasterrena» eta elkarrekin sartzea aliantzan. Stoltenbergek Ankararen gain jarri zuen auzia ebazteko ardura. «Turkiak hartu beharreko erabaki bat da». Ankarak betoa ezarria die, ekintzaile kurduei babesa ematea leporatuta.
Ukrainako gerra frontean, bestalde, Errusiako iturri ofizialek atzo adierazi zuten beren tropek Ukrainaren bi lerro gainditu zituztela Luhansk eskualdean, Donbassen, eta defentsak modu desordenatuan erretiratu zirela. Kievek, baina, ukatu egin zuen informazio hori.
Errusiak Mendebaldeari leporatu dio «interesen oreka» kontuan ez hartzea
Lavroven ustez, «beharrezkoa» da aliatuen «monopolioa» bukatzea. NATOk ez du beste konpromisorik adostu defentsan gastatzeko
![Boluntarioak laguntza humanitarioa banatzen, atzo, Kharkiven. S. KOZLOV / EFE. Boluntarioak laguntza humanitarioa banatzen, atzo, Kharkiven. S. KOZLOV / EFE.](https://www.berria.eus/uploads/s1/73/05/14/p014-f01.jpeg)
Iruzkinak
Ez dago iruzkinik
Ordenatu