Ehundik goiti lagun hil dira Darfurren, tribuen arteko borroketan

Sudango Darfur eskualdeko misseriya eta salamat tribuen arteko borrokek utzitako hildako saila handitzen ari da egunak igaro ahala. Igande arratsetik gertatu diren liskarretan ehundik goiti lagun hil dira Darfur Erdialdea estatuko hainbat hiritan. Misseriya tribuko buruzagi Ahmed Abdul-Rahman Al-Dikhairiren arabera, 136 dira hildakoak. «Salamateko 108 eta misseriyako 28». Sudango hedabideek diote ehundik goiti direla hildakoak baina zifra zehatzak jakitea zaila dela, borroken eremuetatik informazioa jasotzeko dauden zailtasunengatik. Iragan apirilean lehertu zen bi tribu horien arteko gatazka. Hil honen 1ean, berriz, Darfur Erdialdeko Zalingei hiriburuan elkartu ziren bi aldeetako ordezkaritzak, eta borrokak gelditzeko akordio bat lortu zutela jakinarazi zuten. Iragan astean, baina, borrokei ekin zieten berriz ere.

Dabanga irratiaren arabera, Darfur Erdialdeko Garsila, Bundisi, Deleig eta Mukjar hirietan dendak, merkatuak, eskolak eta egoitza publiko guztiak itxita eduki dituzte igande iluntzetik. «Hirien inguruko herrietako eta etxaldeetako bizilagunek alde egin dute tribuetako kide armatuak ailegatuko diren beldurrez», dio Dabanga Irratiak bildutako testigantza batek. Sudango hedabideen arabera, armadak Garsilako merkatua segurtatu du, baina ez da bi tribuen arteko borroketan sartu. Ekainean, ordea, salamat tribuko merkatari bat hil ondoren sortu ziren liskarretan, armadak esku hartu zuen Garsilan eta tribuetako borrokalariak bidali zituen.

Gatazka gunea

Sudanen ia mendebalde osoa hartzen du Darfurrek. Alemania baino eremu handiago da, eta zazpi milioi biztanle inguru bizi dira han. Azken urteetan ezegonkortasun politikoa eta gatazkak nagusi izan dira, batez ere 2003tik. Hainbat izaeratako gatazkek bat egiten dute Darfurren. Alde batetik, gobernuaren eta talde matxinoen arteko borroka dago, eta, bertzetik, tribuen artekoak, nagusiki nomada abeltzainen eta nekazari sedentarioen artean. Gobernuak tribu arabiarren alde egin ohi du, eta beltzak diskriminatu. Gatazkak, baina, ez dira soilik arabiarren eta beltzen artean izaten. Misseriya eta salamat tribuak, adibidez, arabiarrak dira.