Ustez alferrik izan zen otsailaren 17ko bilera, Isabel Diaz Ayuso eta Pablo Casado elkartu zituena. Baina biharamunean, Espainiako PPren zuzendaritzak ustekabea eman du, pauso bat atzera egin, eta Ayuso Madrilgo erkidegoko presidentearen aurkako zigor txostena bertan behera utzi du Casado Espainiako PPren buruak.
Espainiako eta Euskal Herriko PPko buruzagi batek baino gehiagok dei egin die bi-biei adostasun bat lor dezaten. Alberto Nuñez Feijook atzo ostirala eskatu zion Casadori akordio bat egiteko, azken astean piztu den barne mailako gerra itzaltzeko, eta kasu egin bide dio PPren buruak.
Espainiako hainbat hedabidek zabaldu eta liskartutako bien inguruko jendeak baieztatutakoaren arabera, ostiralean bilera bat egin zuten Casadok eta Ayusok. Baina ez zen akordiorik egin saio hartan. «Alferrikakoa» izan zela ziurtatu du Diaz Ayusoren taldeko jendeak.
Baina handik ordu batzuetara, eta beste azalpenik gabe, Espainiako PPren zuzendaritzako iturriek esan dute ontzat eman dituztela Diaz Ayusok Casadori emandako azalpenak, eta zigor txostena bertan behera utziko dutela. Madrilgo presidenteak bere anaiaren fakturak erakutsi zizkion Casadori bulegoan, bilera horretan.
Bertsio guztiak ez datoz bat. Diaz Ayusoren inguruko jendeak zenbait hedabideri kontatutakoaren arabera, ostiraleko bileran Casadok eskatu zion publikoki adierazteko PPk ez zuela Diaz Ayuso bera ikertu, eta, trukean, PPren zuzendaritzak zigor txostena kenduko ziola. PPren zuzendaritzak, ordea, ukatu egin du halako truke akordiorik eskaini zutenik. Aldiz, PPren buruen arabera, Casadok Diaz Ayusori esan zion inoiz ez zutela ikertzeko agindu, eta hori esaten duen edonoren aurka epaitegietara joko duela.
Ordu gutxitan lehertu du PPko bi agintarien arteko tentsio luzea. Ez da ezkutukoa bien artean izan direla gatazkak lehenago ere, baina popularrek asmatu dute horiek baretzen. Orain arte. Gaztela eta Leongo hauteskundeetako emaitzak ezagutu ondoren, PPren estrategia egokia izan ote zen eztabaidak indartzen ari zirenean, etorri da leherketa.
Asteazkenean, El País egunkariak baieztatu zuen, ustez PPren zuzendaritzak esanda, Madrilgo Gobernuak kontratu «susmagarri» batzuk sinatu zituela Diaz Ayusoren anaia batekin, eta goizaldean argitaratu zuen. Hori baino ordu batzuk lehenago, beste hedabide batzuek zabaldu zuten Casadoren bulegotik Diaz Ayuso espiatzeko agindu zutela. Madrilgo presidenteak ustezko espioitza horri buruz esandakoengatik erabaki zuen PPren buruzagitzak zigor txostena irekitzea.
Alderditik kanporatua izateko arriskuan zen Diaz Ayuso, eta ostegunean salaketa gogorrak egin zizkion Casadori. Eta Casadok, ostiralean, are gogorrago erantzun zion Madrilgo presidenteari, irratiko elkarrizketa batean, zuzenean akusatu baitzuen Diaz Ayuso, anaia baten alde faborezko tratua egiteagatik. COVID-19aren pandemia erdian maskara batzuk erosteko tratu bat errazteagatik gizonak dirutza bat jaso zuela zehaztu zuen.
PPren buruzagiek 2021eko irailean eskatu zizkioten azalpenak Diaz Ayusori aurreneko aldiz, kontratu horiengatik, baina badirudi Madrilgo presidenteak uxatu egin zuela, orduan, PPren buruzagitzari azalpenak ematea. Kontua da, 2021eko apirilaren 1ean, Tomas Diaz Ayusok dirutza bat jaso zuela Madrilgo erkidegoarentzat maskarak erosteagatik. Madrilgo presidentearen arabera, 67.785 euro jaso zituen haren anaiak; Casadok ostiralean esan zuen gizon horrek 286.000 euro jaso zituela.
Popularrak estututa ibili dira azkeneko egunetan, eta barealdirako deia egin dute hainbat buruzagik. Tartean, Carmelo Barrio PPren eta Ciudadanosen Eusko Legebiltzarreko bozeramaileak. «Batasuna, batasuna eta batasuna», eskatu du. Gatazka sortu duten bi aldeei arazoa konpontzeko eskatu die.
