Commonwealth uztea erabaki du Gambiak, izatez «neokoloniala» dela iritzita

Gambiak gehiago ez duela «izate neokoloniala duen edo kolonialismoaren hedapena ordezkatzen duen erakunde batean» parte hartuko argudiatuta, Yahya Jame presidenteak Commonwealth uztea erabaki du. 2003an utzi zuen Zimbabwek Nazioen Mankomunitate Britainiarra —aurreko urtean kanporatu egin zuten—, eta Gambia erabaki hori hartu duen Afrikako bigarren herria izan da.

Londresi Gambiako oposizioa babestea egotzi izan dio Jamek, eta nazioartetik Gambia kritikatu izan dute homosexualitatea kriminalizatzen duelako. NBEren batzarrean, Jamek esan zuen homosexualitateak arriskuan jartzen duela gizateriaren geroa.