Bruselaraino iritsi da salaketa

Ezustean eta egun argiz itzuli zen herenegun Clara Ponsati kontseilari ohia Bartzelonara. Europako Parlamentuko diputatua da gaur egun, eta immunitatea du, baina Espainiako Auzitegi Gorenak hura atxilotzeko agindua emana zuen, desobedientzia leporatuta. Ondorioz, Kataluniako hiriburuan bere bidaiari buruzko azalpenak emateko agerraldia egin ostean, atzeman egin zuten mossoek. Baina Bruselara itzuli zen atzo goizean, Europako Parlamentuko osoko saioan parte hartzeko.

Ikusi gehiago:Analisia, Gorka Berasategi Otamendi: 'Puigdemonti bidea egiteko pausoa'

Ponsati herenegun gauean utzi zuten aske, epailearen aurrean deklaratu ostean. Kontseilari ohiaren aurkako auzia daraman epaileak, Pablo Llarenak, apirilaren 24rako deitu du, desobedientzia delitu batengatik auzipetua dagoela jakinarazteko. Bide batez, indargabetu egin du buruzagi independentista atxilotzeko agindua. Horrez gain, ebatzi du Ponsatik bizileku bat eta telefono bat jakinarazi beharko dituela une oro non dagoen jakin ahal izateko, eta ohartarazi dio atxilotua izan daitekeela deklaratzera deitzen diotenean joaten ez bada. Politikari independentistak aurreratu du ez dela auzitegian aurkeztuko.

Babes eskaria

Europako Parlamentuan hasiak dira aztertzen Ponsatiren atxilotzearen ondorio juridikoak, diputatuak babesa eskatu ostean, parlamentuko kide izanik immunitatea baitu. Hala, kontseilari ohiak bere atxilotzearen berri eman zion herenegun parlamentuari, eta babesa eskatu zion.

Gainontzeko diputatuei ere eman zien Ponsatik atxilotzearen berri, eta zenbaitek elkartasuna helarazi zioten: besteak beste, European Free Alliance taldeak, Esloveniako Milan Brglez eta Irlandako Clare Daly ordezkari sozialistek, Fabio Massimo Castaldo Italiako 5 Izar Mugimendukoak, Stelios Kuloglu Greziako parlamentari eta GUE/NGL taldeko kideak eta François Alfonsi Korsikako eurodiputatu berdeak.