Lau palestinar hil dira Gazan uholdeen ondorioz

Ezponda bat amildu egin da, eta zenbait denda suntsitu ditu errefuxiatuentzako kanpaleku batean. Lau hildakoetatik hiru adingabeak dira.

Gazako errefuxiatuentzako eremu bat, urak hartuta, joan den larunbatean. AHMAD AWAD / EFE
Gazako errefuxiatuentzako eremu bat, urak hartuta, joan den larunbatean. AHMAD AWAD / EFE
gotzon hermosilla
2026ko azaroaren 9a
10:00
Entzun 00:00:00 00:00:00

Negua hurbildu ahala, are larriagoa bilakatzen da errefuxiatuentzako eremuetan bizi diren palestinarren egoera Gazan. Ostiraletik, euriteek eta uholdeek hartuta daude Gazako zenbait kanpaleku, eta urak denda ugari eraman eta beste batzuk hondatu egin ditu, han bizi ziren palestinarrak kale gorrian utzita. Atzo, hareazko ezponda bat amildu egin zen zenbait dendaren gainean, Deir al-Balahko eremuan, eta han bizi ziren lau palestinar hil ziren, emakume bat eta hiru adingabe.

Israelek ezarritako blokeoak oztopo handiak jartzen dizkie Gazara laguntza humanitarioa bidali nahi duten elkarteei. Krisien Kudeaketarako Europako komisario Hadja Lahbibek esan du behar-beharrezkoa dela laguntza Gazara helaraztea: «Familiak lapikoak eta zartaginak erabiltzen ari dira ura dendetatik ateratzeko. Uholdeek errefuxiatuen kanpalekuak suntsitu dituzte. Euritearen ondorioz, orain are larriagoa da lehenagotik ere jasanezina zen egoera».

Gaur egun, 1,65 milioi palestinar bizi dira errefuxiatuentzako eremuetan ezarritako kanpalekuetan, eta 44.000, berriz, Israelgo armadaren bonbek kaltetutako eraikinetan.

Agiri baten bidez, Hamasek Israelen okupazioa eta su etena kudeatzeko ardura duen Bake Batzordea jo ditu egoeraren erantzule: «Neguak krimena eta setioa utzi ditu agerian. Okupazioa hondamendia areagotzen ari da, su etenaren akordioan ezarritako laguntza protokoloa oztopatuta, eta Bake Batzordeak ez du ezer egiten hori konpontzeko».

Beste bi hildako eraso batean

Uholdeek ez dituzte geldiarazi Israelen erasoak palestinarren kontra, eta iazko urriaren 9tik Israelen eta Hamasen arteko menia ustez indarrean dagoen arren, bonbardatzeek ez dute etenik. Atzo, Israelek Al Qadisiyako errefuxiatuentzako eremuari eraso egin zion, drone batetik jaurtikitako bi misil erabiliz, eta bi palestinar hil zituen.

NBE Nazio Batuen Erakundeko batzorde independente batek salatu du genozidioak bere horretan iraun duela su etena ezarri zenetik, eta azken urtean Israelek ia 1.500 palestinar hil dituela. Gazaren kontrako erasoa hasi zenetik, Israelgo armadak ia 75.000 palestinar hil ditu, Gazako Osasun Ministerioak emandako datuen arabera.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA